茶煲傳

仔仔學習之旅 -- 1

2011-05-18T11:43:00.003+08:00

肥芝近排好鍾意將對手放入個口度，食到"Jup Jup"聲。一路都以為佢想食手指唔識食，定係佢想出牙呢，但幾日前睇咗本BB雜刋，發現原來係我搞錯。

原來BB係而家呢個時間要分辨嘢，都會用個口。而家BB啱啱發現自己對手嘅存在，所以就會將自己對手放入口度試。

除外鍾意放對手入口，肥芝係繼我之後，屋企裡面最多嘢講嘅人，佢成日都會"呢呢 nur nur"，但又完全唔知佢講乜。佢對住吊住嘅公仔都"nur"一餐，又時又會撩人傾計，如果你唔睬佢，佢就會發脾4。真係好搞笑。

見到肥芝識得越嚟越多嘢，真係好開心呀。

誓不低頭

2011-05-18T09:27:00.003+08:00

都唔知係咪遺傳，我自問係一個好硬頸嘅人，因為係遺傳自我亞婆。估唔到連肥芝都咁硬頸。

肥芝佢真係好有性格，邊度有BB唔食奶架。但佢就真係話唔食就唔食，點迫都唔肯食。但我亞婆又死都要迫佢食。咁就弊啦，搞到拆晒天。

其實，個BB唔食一餐半餐咪由佢囉。佢點都唔可以一日唔食嘢，到下一餐早少少比佢食，兩餐變一餐咪得囉。我都唔明做乜成日都要整到個BB喊到拆天，個BB喊就事小，我怕嚇親個小朋友，到時唔肯比婆抱，但婆婆又死要抱，就死啦。

了解仔仔多一點

2011-05-02T20:14:00.002+08:00

今日得我同老公喺屋企湊仔。所以，就由我哋同仔仔沖涼嘞。一路仔仔都唔係好鍾意沖涼，一沖親涼就喊到拆天，我哋成日都以為佢驚，仲有卡介苗個傷口痛同D水凍。

老公見今日熱熱地，所以張D水教凍少少，點知仔仔勁開心，仲喺水到玩到側晒身，見到仔仔咁玩得咁開心，我都好開心。 ^_^

仲有呀，我今日放仔仔喺sofa，跟住捉住佢兩隻手，嘗試比佢借少少力起身，練吓D臂力。點知仔仔真係可以成日人坐起身。我同老公都成個人呆咗呀，估唔到仔仔咁勁，人仔細細咁好力。

老公即刻飛過嚟，錄低我同仔仔玩嘅過程，我仲放埋上fb添。仔仔真係好叻仔呀。我準備同仔仔練習吓轉身，不過唔知係咪早咗D呢。我怕自己揠苗助長，到時就弄巧反拙啦。仔仔，你要努力呀，爸爸媽媽永遠都咁錫你咁支持你架。

慶祝首個母親節

2011-05-02T19:57:00.002+08:00

尋日同仔仔返咗柴灣，同太婆同婆婆慶祝母親節。

今年係我第一次做母親節嘅主角，因為……我做咗人媽媽啦。 ^_^
我前晚詐肚痛入咗廁所send sms比我個妹，吩咐佢記得買扎花比我哋媽咪呀。點知老公都有叫亞妹代仔仔買扎花比我呀。勁開心……

但食飯嘅時候，又再次出事啦。仔仔去食飯嘅途中瞓咗覺，其實由婆婆屋企出發去酒樓只係十五分鐘路程，所以其實仔仔都只係瞓咗好少時間。

去到酒樓，姨婆就話要同仔仔玩，咁仔仔瞓咗嘛。我就覺得唔應該整醒個瞓緊覺嘅BB去陪D大人玩囉，又係佢哋話應該係大人就小朋友，唔係小朋友就大人嘅。咁而家又要整醒仔仔去應酬咁多個大人，搞到仔仔唔夠瞓，唔肯食奶。仲搞到我同亞媽又嘈一鑊。亞媽話D亞姨錫仔仔先想同佢玩啫，人哋咁開心點推人哋啫。但佢哋真係錫仔仔就唔應該喺仔仔瞓緊覺嘅時候整醒仔仔陪佢哋玩，應該比個BB瞓多陣嘛。仲有，唔通D亞姨玩得開心就要仔仔唔夠瞓扭晒計咩，扭晒計嘅BB有咩咁好玩，咪又係玩我哋同辛苦我哋同仔仔。

咁我真係覺得唔應該同唔公平嘛。點解要整醒仔仔啫，又唔見佢哋整醒美琪個仔。仲有呀，你哋要同我個仔玩嘅時候就整醒佢，玩完開席就要仔仔瞓返，係咪傻架。你估我個仔係玩具呀，企直就瞪開眼，瞓低就合埋眼呀。咪咁對仔仔先得架。

湊B情況失制

2011-04-29T18:19:00.002+08:00

我亞媽由我有咗就嚟幫手睇住我，同日日都由柴灣嚟葵涌煮飯比我同小鵬食，一直都好盡心照顧我哋。而且，佢又肯喺BB出世後同我哋一齊住，照顧我坐月同照顧BB。

但我哋始終係兩代人，湊B嘅嘢好多時諗法都有出入。其實，我唔想對亞媽惡言相向，因為佢始終係一番好意嚟幫手。但有時見佢一手係我or小鵬手上搶走喊緊嘅肥芝去，真係令到我有少少火嚟。話晒我先係肥芝嘅亞媽嘛，為乜你呢個亞婆做嘅嘢先啱呢！況且，都唔係每個亞媽一生完個B就識湊架啦，你做乜唔比D時間我同小鵬去學吓呢？

唉…真係唔知點開口同亞媽講，可唔可以肥芝嘅嘢由我哋話返事。你係幫我手，唔係我對手囉。

猴棗散驚魂

2011-04-20T07:38:00.001+08:00

之前見仔仔有D痰，見到baby kingdom D post話食猴棗散可以去痰，就買咗D比仔仔食。

尋日下晝照指示比仔仔食咗半樽，仔仔一路都無乜嘢，又食得又玩得，只係到咗夜晚十點幾同仔仔換片準備食奶，發現仔仔痾黑屎。

好驚，因為黑屎可能係內出血，嚇到我即刻上網search有無D食完猴棗散痾黑屎嘅post同資料。但一直都唔見就，心諗唔通真係仔仔有事。唔通我錫佢變成害佢。

之後，老公同婆婆話睇埋下一次便便先決定係咪要睇醫生啦。好在今朝五點幾食果餐奶，發現佢又痾咗，今次係青屎，即係無出血啦。咁上次果D黑屎可能係消化唔到嘅猴棗散，又可能係化咗嘅痰同清咗腸入面嘅嘢。

囝囝第一次打針

2011-04-08T22:12:00.002+08:00

我哋同囝囝join咗個BB疫苗plan，今日第一次打針(六合一加口服輪狀病毒)。對我嚟講，簡直係大件事。因為我好驚囝囝打針會痛，同打完針會有反應發高燒，同D輪狀病毒會令到囝囝痾得好緊要。約咗10點去到醫療中心，護士要我哋等半個鐘，因為佢要肯定食輪狀之前半個鐘無食過嘢。但囝囝其實10點半就差唔多要食奶，所以囝囝等到咁上下，已經開始唔耐煩，開始扭計。入到房，護士仲要講一大輪嘢，講解吓囝囝打完針會有咩反應啦，可以點樣照顧囝囝啦，仲有講埋我哋嚟緊嘅打針時候啦，仲有就係幫囝囝檢查吓。但囝囝已經喊到拆晒天。好在個護士都醒目，同囝囝食咗D甜甜嘅輪狀病毒先，頂一頂肚先。然後就同囝囝打針。其實囝囝打針都只係喊咗兩聲就收咗聲。但最慘嘅係，食完個輪狀要半個鐘後先可以食奶。大件事啦，一出門口囝囝喊到傻咗。唯有即刻飛的返屋企，然後即刻沖奶比囝囝。夜咗少少，囝囝真係開始發熱，咁我哋就同佢貼退熱貼同開冷氣比囝囝。希望囝囝唔好發高燒啦。

囝囝需要我

2011-04-07T10:03:00.000+08:00

尋晚，大學同學Roy約晒D同學出去食飯，順便派帖比我哋。我同老公一齊去咗食飯，留返囝囝同婆婆兩個喺屋企。原本都諗住食到9點度走先，早D返屋企睇囝囝。點知同D同學傾開D湊B經驗同取吓經，唔經唔覺就傾到10點先走。返到屋企，婆婆抱住囝囝，見我哋返嚟就同囝囝講，"媽媽返啦!" 原來囝囝成晚都唔肯瞓，喺度搵我"暗"佢瞓覺，仲成日周圍望搵我。聽到自己被囝囝咁需要，個心好甜，但又有D心痛，因為見囝囝捱眼瞓等我門。

罪孽深重

2011-04-05T09:50:00.002+08:00

囝囝而家每晚都會同我哋一張床瞓，為嘅係可以有人睇到佢瞓覺嘅時候有無嘔奶，同方便餵奶。尋晚，當我又聽到囝囝喊嘅時候，我就隨手喺床頭拎咗個鬧鐘嚟睇吓係咪夠鐘食奶。睇完想放返上去個床頭櫃嘅時候，一時錯手，成個鬧鐘跌咗落囝囝個頭度。跟住係我大叫嘅同時，就聽到囝囝嚎哭。我即刻抱起囝囝驚到喊咗出嚟，老公即刻起身開燈，睇吓囝囝整親邊度。但囝囝喊咗兩吓就收咗聲再瞓過，老公同我講囝囝無事嘅，但我已經喊到成個豬頭炳咁。跟住老公同我講，叫我冷靜吓，佢去沖奶。我就一路喊一路幫囝囝換片。最後，果餐我都留返比老公餵囝囝，因為我好內疚，唔可以再好冷靜咁餵囝囝。果晚，老公要一路餵B一路安慰我。從此以後，個鬧鐘就放咗落嚟我同老公嘅枕頭中間，慬防我再失手傷到囝囝。

仔仔唔舒服呀

2011-04-02T14:07:00.002+08:00

仔仔今日已經5週3日大，但兩日前開始有少少咳同鼻塞塞，仲有少少肚痾。尋日睇咗醫生，醫生話佢喉嚨有少少發炎，應該係有細菌，而且佢仲吞咗D菌落肚，所以有D肚痾，因為要痾返D菌出嚟。尋日同今日仔仔食咗D藥，情況好咗D，只係仲不停有咳，特別係瞓覺就咳得最嚴重。除此之外，我成日抱仔仔嘅時候，都撞到仔仔隻眼，搞到仔仔隻右眼成日流眼水，今日仲成日有眼膠，如果再係咁，聽日就要同仔仔去睇吓隻眼。本來好想仔仔健健康康﹑快快樂樂，但我嘅唔小心，成日都令到仔仔受到傷受。我都唔知點做人亞媽。

人奶大作戰 2

2011-03-08T17:52:00.002+08:00

馱住亞B嘅時候，由不同渠道吸收餵哺母乳嘅好處，所以晞晞未出世已經同老公商量好，盡可能給囝囝最好的，天賜的禮物。

可惜，一直憧憬餵哺母乳的情景，當自己親自落手落腳餵嘅時候就知道有相當嘅難度。初頭，乳量不足。二來囝囝自出娘胎就超級大食，(其實，喺肚度已經起級大食。)總係餵極唔飽。第三，囝囝初出世，第一次吸吮時，已經整到我好痛，所以一路都有陰影覺得餵人奶好辛苦。

返到屋企，因為方法同時間配合同控制得唔好，因此一度諗過放棄。但始終心有不甘，未曾努力就放棄。所以，決定做泵媽，泵得幾多食幾多。而且，呢兩日晞晞嘅食奶時間都比較穩定，可以喺晞晞食奶前30-40分鐘泵定出嚟比佢。

由今日開始，我又會再次努力，向泵媽呢個目標出發。
努力﹗

十二朝

2011-03-07T14:37:00.002+08:00

3月7日係晞晞嘅十二朝呀。我都唔知十二朝有咩意思，只係知今日老公要幫晞晞返亞嫲度拜祖先，同埋D親戚可以上嚟睇晞晞同食薑醋囉。不過，咩意思都好啦，起碼話比我聽我已經做咗人十二日媽媽啦。

今日，亞婆﹑大姨﹑三姨同美琪一家過嚟。晞晞從來都未見過咁多人，比咁多人圍住都係第一次。晞晞好叻無失禮人，無喊。不過，佢竟然喺咁多人面前表現大大。咁果一督真係好大，好大。個個都話勁臭。哈哈……梗係啦，晞晞雖然得十二日人仔，但已經好懶，有幾懶?就係佢會將所有嘅便便儲埋一次清，所以每次都大大督，每次都勁臭臭。

話雖晞晞見到咁多人都無喊，但我同亞媽都見到佢係表面鎮定，內裡驚青。佢其實見到咁多人都驚到咀唇變咗青青紫紫。只係晞晞可能仲未反應得切去喊啫。Anyway, 今日個個嚟到都讚囝囝得意，對眼好精靈。我都好開心呀。仲有，囝囝今日又收到好多禮物。而亞姨送比我同老公嘅禮物仲有好大嘅驚喜，就係盒餅竟然過咗期呀……哈哈……

再戰母嬰健康院

2011-03-07T13:45:00.001+08:00

上星期一，晞晞啱啱出世第五日，因為體重未回覆到出世水平，所以就要一個禮拜後再返去磅重。

今日再返去磅重，晞晞一個星期已經重咗0.43kg，有成差唔多9磅呀。醫生仲話佢D體重增加得幾好添。

下次再磅就要等滿咗月之後啦。

首禮拜回顧

2011-03-05T17:08:00.002+08:00

返到屋企一個禮拜，真係有D唔識形容。

事實上，返屋企坐月有亞媽幫手，我著實係好輕鬆。但唔知點解自從肥芝出咗世之後，我日日都喊幾次。真係好小事都會眼濕濕，同流眼淚。

喊嘅原因有好多。
1. 餵唔到人奶……肥芝成日都當D人奶係點心，瞓醒拎嚟"mui"兩嘢。然後醒D又搵奶食，我再比佢，佢就推開我。有試過泵出嚟，但D時間又唔見洗。唔係成日都趕得切佢食奶前泵到比佢。仲有，見到肥芝食完奶粉，好滿足咁笑住瞓，有時真係唔明自己點解咁固執要佢食人奶。

2. 覺得亞媽好辛苦。亞媽過嚟幫我手，除咗湊肥芝，仲要買餸﹑煮飯﹑洗衫﹑打掃﹑洗奶樽﹑洗肥芝D衫……佢仲要受氣，有時去買餸買得少又比人話。覺得自己委屈咗自己亞媽。

3. 肥芝受驚喊到嘔奶，我又心痛到喊，好似自己照顧得佢唔好，搞到個仔喊到食晒D風落肚，搞到嘔奶。

4. 坐月咩都唔做得，見到身邊個個忙到一頭煙，自己又幫唔到手。淨係坐喺度抱住個仔，換吓片，遞吓紙巾……其實我都數唔到自己做過D乜，諗落真係無用到爆。

5. 囝囝成日都有痰，搞到食奶食得唔好。見到個仔辛苦，自己仲辛苦。

希望坐月嘅日子快D過，可以親力親為湊囝囝，等亞媽可以多D時間玩吓孫而唔係做工人咁做。囝囝快D清晒D痰，食奶食好D，唔洗肥嘟嘟，但要健健康康。

出院後第八日

2011-03-05T13:27:00.002+08:00

同晞晞返咗屋企8日啦。一路都有亞媽陪住，亞媽今日因為一D原因返咗柴灣，我突然有種頓失依靠嘅感覺。雖然今日老公放假，奶奶都有上嚟幫手煮兩餐，但總係唔能夠安心。

其實我並唔係懷疑老公湊囝囝嘅能力，只係擔心囝囝已經識得認人，認得婆婆嘅聲同氣味，到時就喊死囝囝，辛苦死老公，心痛死我。

而且今晚仲少咗一個人去輪更睇住囝囝，真係驚我哋兩公婆唔夠精神湊仔。

肥芝體重回顧

2011-01-28T11:44:00.002+08:00

13 Nov 2010: (26w1d) 0.954kg - 2.0988lb
11 Dec 2010: (30w1d) 1.588kg - 3.4936lb
8 Jan 2011: (34w1d) 2.419kg - 5.3218lb

下次再照就係31 Jan 2011. ^_^

好緊張呀

2011-01-24T11:24:00.000+08:00

聽日知道亞達個B出咗世，都比預產期早咗十日。唔知肥芝會唔會都早出世呢? 好緊張呀。

影咗輯相啦

2011-01-23T23:27:00.003+08:00

之前聽講座，抽到一張coupon去影孕婦OR家庭相，本來都想等肥芝出咗世，帶埋佢一齊去影。可惜，個有效日期到三月頭，怕到時未坐完月，咁就晒咗張coupon啦。所以，我哋決定去影返輯大肚相。如果靚嘅，等肥芝出咗世再帶佢去影都未遲。^_^

原先安排得好好，諗住結婚紀念日去影架。因為平日唔洗加$300嘛。但之前又book唔到。最後，book咗尋日去影。

帶咗5套衫去換，影咗個幾鐘，影到我好攰呀。最終都係轉plan加$要咗20張相。過兩個禮拜有得囉啦。我諗都要過咗農曆年先有相睇。

第一次產檢就出事

2010-09-18T10:03:00.002+08:00

星期二(九月十四日)，同肥芝去做第一次產檢，原本一切都好順利。只係做婦科檢查果陣，放個鴨咀鉗入去果陣感覺到有D痛。

但到咗星期三朝起身果陣就發現有少少流啡，但流量都唔係好多，所以果日就返咗工啦。但食完lunch之後，去廁所發現D啡流多咗。打完比亞媽商量決定去睇急症，通知咗老闆就走人。因為上次瑪嘉烈個醫生建議我要喺廣華度生，有咩事就最好去返廣華度睇，今次就好聽話咁去咗廣華嘞。

但廣華個急症真係超多人，我之前喺瑪嘉烈度睇急症都唔洗十五分鐘，但今次要等成兩個鐘，真係過份。幫我檢查個醫生話個胎都成4個月大，唔應該會流啡，佢建議我留醫觀察。當日入院註院醫生再幫我做婦科同焄超聲波檢查吓BB。

做婦科果陣，醫生話入面係有小小出血，拎咗D分泌去化驗。
到照超聲波果陣，醫生話肥芝有心跳，仲郁得好犀利喎，個胎無咩唔妥。醫生問我知道係仔定女未，我話未知呀。佢問我想唔想知，我話想架。佢就幫我照啦。醫生話肥芝八成係仔，但要出咗世先可以話係十成。仲有，等佢檢查完晒之後，佢會比我睇吓肥芝。

醫生檢查完晒，話肥芝無事。就比我睇吓佢，第一樣就應該睇吓個仔仔特徵，點知肥芝佢竟然夾住唔比我睇喎，醫生都話:"咦，點解夾住咗嘅，頭先都睇到架喎。唔緊要啦，換個角度，我哋低炒上去啦。"不過淨係見到蛋蛋啫。不過，知道肥芝無事，仲知道佢八成係仔，我都已經好開心啦架。

地鐵見暈第二篇 -- 後記

2010-09-05T17:09:00.004+08:00

星期五(九月三日)，又係放工嘅時候，又係搭地鐵，又係無位坐，不過今次無上次咁好彩啦。

情況同上次差唔多，但今次一嚟就覺得暈。去到荔枝角閂咗門果一下，就開始見暈。望過周圍又係無位坐，等唔切啦。我開始覺得個手袋同把直遮好重，同埋覺得要落車搵櫈坐。但行到去車門口，睇嘢己經發白。落到車發現無櫈坐。都無辦法啦，因為我已經再行唔到啦，我靠住牆，瞇埋眼。

然後，聽到有把女人聲，同有人拍我。我只係可以開到少少眼，發現自己已經瞓咗落地下。我;完全唔知自己係幾時同點樣跌落地。但我被人叫醒之後，全身都郁唔到，講唔到嘢，開唔到眼，只係聽到身邊D人講嘅嘢，同埋覺得個肚有少少痛。

拍醒我果個女人一路陪住我，幫我KEEP住CHECK脈搏，原來佢係個護士。佢見我一直按住自己個肚，問我係咪有咗BB，我話"係呀"。然後，佢再問我覺唔覺得下體有嘢流出嚟，我係覺得個人全身都濕，因為之前標冷汗，但流嘅就好似無。我答返佢"無"。佢同個地鐵職員，一路陪我，問關於我嘅資料。但我每次只係好辛苦咁講到兩個字，所以，問資料都問咗好耐。

等到白車嚟到，我完全無力自己起身上輪椅。全程都係救護員抬我。直到去到瑪嘉烈，亞媽嚟到，佢見我瞓喺病床，本來個人都定D。但佢見醫生叫我舉起手同遞起腳，我原來做唔到，連手指都係郁到一隻，佢都開始驚起上嚟。

其實，由我被人拍醒，去到醫院，一路都好驚肥芝有事。直到喺急症室，護士同我一齊聽BB心跳，到我真係聽到BB嘅心跳聲，成個人都定返晒。其他嘅都好少事。

喺急症室照咗心電圖，就去咗病房留醫觀察，仲話聽日要抽血驗﹑同幫BB照超聲波。

好彩，照超聲波嘅時候，醫生好細心，佢睇得好認真，佢話BB個心跳正常，子宮都無出血。我問醫生咁BB郁唔郁呀?醫生話BB郁呀，佢仲郁得好利害。見BB同平時一樣，我成個人都放心晒。仲即日可以出院。

我都問過醫生，點解我會暈，係咪血糖或者血壓低。佢話都唔係，佢問我係咪企咗好耐，我話都企咗半個鐘。佢就話大肚婆唔可以企咁耐。如果真係無位坐，都要原地行。等D血唔好垂晒落腳，要小腳嘅肌肉PUMP返D血返上心。

哦，原來係咁。不過，老公都唔再比我放工嘅時候搭地鐵啦。以後放工都要搭的士啦。

地鐵見暈第一篇 -- 後記

2010-09-01T23:52:00.001+08:00

今日放工諗住七點幾走都算早啦，所以就去搭地鐵。

我同事Ivanhoe陪我一齊去搭地鐵，一齊去到太子，我先自己一個轉車。放工時候嘅地鐵，真係好多人，由九龍灣去到太子都無位座。去到近太子嘅時候，個人開始覺得有少少唔妥，個頭開始痛。初時都以為可能地鐵大風啫。照一個自己轉咗車，

喺太子上咗車就知出事。我一上車，開始不停打喊露，開始覺得口渴，又搵唔到位坐。去到長沙灣站頂唔順啦，落去車，好彩長沙灣月台有長櫈坐。一坐低，眼前就白晒，咩都睇唔到。呼吸開始困始，不停要抖大氣。個人完全無晒力。

幸運過咗一陣，大約二十秒度，就開始正常返。個人有返力，條氣都無咁速，對眼都睇返嘢。有返知覺之後，我又坐多一陣，見無咩事，就等下一班車返屋企。呢班車有好多位坐，所以可以坐到返葵芳。上咗車第一時間打比老公，話比老公聽發生過D咩事，佢就叫我落咗地鐵，轉的士返屋企啦。但落咗車之後，真係好口渴，所以自己買咗支水飲。飲咗D水感覺好咗D，唔洗五分鐘嘅車程，我已經將支水飲咗5分4 啦。

肥芝婆婆生日

2010-08-28T21:25:00.002+08:00

今日係肥芝婆婆生日，有咩慶祝活動比睇肥芝嘅裸照更氹得婆婆開心呀。所以我就BOOK咗今日去私家度檢查。

可惜，一出街就落大雨，上到地鐵又多人又無位坐，焗得幾緊西，焗我勁唔舒服，又想嘔。好彩唔洗一陣就到咗旺角啫。去到首先搵位同婆婆&EE飲茶，同等埋老公。

去到診所，等咗一陣，到我哋啦。婆婆梗係要入去睇吓粒孫啦，仲有做爸爸嘅，都唔執輸。

今日，肥芝已經有8CM大啦。比預產期大咗一個禮拜。喺電視度，見到肥芝郁手郁腳，睇得我哋幾開心。婆婆最想知都係肥芝係仔定女。但醫生話，而家先3個半月，未知喎。遲D啦。 ^_^

肥芝11周啦

2010-08-04T19:13:00.004+08:00

今日肥芝己經11周啦。

啱啱個星期六又去咗醫生度做檢查，照超聲波。喺照超聲波嘅時候，見到肥芝嚟咗個"肥芝彈"，嚇到我都成個彈起呀。 ^_^

醫生話肥芝都幾穩定，有37.4MM大啦，見到頭﹑手﹑腳同埋眼仔同鼻哥。而個胎盤都生緊出嚟，而家算係穩定D架啦。

肥芝穩定咗，我都係時候要返工啦。放咗差唔多兩個月SICK LEAVE，個人都有D悶悶哋。仲有，要亞媽日日喺柴灣過嚟照顧我，我都唔係咁好意思。仲有呀，準婆婆成日都買嘢比肥芝，我屋企就嚟無位擺啦。

不過，我仲未同老闆講我想提早一星期返工。始終要求返工都唔係我嘅STYLE。

生理情況穩定，但心理尚未平靜

2010-07-15T08:55:00.003+08:00

自從上個星期三媽咪去完旅行返嚟，即日就開始上嚟我屋企，全天候照顧我。

呢個星期胃口好咗唔少，因為日日都食到自己親自點嘅餸菜，食得零舍開心。

只可惜，因為仍然處於初孕期，所以我一直都好擔心個胎會唔穩。好彩嘅係，一路都無見紅，而且公司亦都比我放假放到八月中，等個胎夠三個月先再返工。但個肚就成日都痛，所以個心一直都好唔安落。

心情時上時落

2010-07-03T11:17:00.002+08:00

知道有咗肥芝差唔多三個禮拜，呢三個禮拜嘅心情飄忽得連我自己都驚，今日好開心，第日又會喊到豬頭咁。一時自信肥芝會健康成長，一時又怕肥芝會突然消失。覺得自己就好似神經失常。好怕自己一個人喺屋企，無人陪嘅時候，自己都唔知想做D乜，不其然又開始諗東諗西。
"今日個肚無痛喎/今日無作嘔喎，肥芝係咪仲喺度架?"……O_o
"又想嘔，但又嘔唔出，好辛苦呀。"…… -_-"
手按住自己個肚，"我摸到你(肥芝)嘅心跳呀"……^_^

呢D日子唔知幾時先過，成日都會驚而家好似已經有好多人知啦喎，肥芝會唔會真係小器呢?唔可以再比人知(但好似已經全世界嘅人都知啦)。

心情幾時先會穩定D呢?肥芝嘅存在依然好唔實在，幾時先真正感覺到佢嘅存在呀?

遺憾補不了……終了

2010-07-01T23:10:00.002+08:00

我一直有一個遺憾就係一個我識咗差唔多廿年嘅朋友，佢無嚟到參加我嘅婚禮。由於一件小事，一個口不擇言加上一個自尊心暴漲嘅情況下，我哋無聯絡差不多兩年。

幸好，肥芝嘅出現。因為一句"臥床休息"。
我哋大家又再喺MSN上互相關心，佢比咗好多佢嘅經驗分享我，我有咩不安都向她分享。心情好咗，亦了結了一件心事。

急症後覆診

2010-06-29T16:33:00.002+08:00

尋日睇完急症，今朝要返瑪嘉烈覆診。

尋晚，一直都瞓得唔好。雖然今日係睇8點半，但我同小鵬兩個6點幾就起咗身啦。換完衫，我哋去咗食早餐。然後，就上咗瑪嘉烈。因為我真係要行得好慢，所以老公一路拖實我。

上到去，循例問咗我嘅情況同去睇急症嘅原因，就等醫生照陰道超聲波。我問係咪一等要照陰道，個護士話因為個bb太細，唔照陰道嘅話會照唔到。但因為之前睇中醫，個醫師吩咐過唔好比西醫再喺陰道度檢查，所以我同老公都有d猶豫係咪要照陰道。最後，老公決定問清楚個醫生照陰道對個胎有咩影響先再決定。

點知醫生話，照陰道除咗令到個孕婦有少少唔舒服，其實同照肚皮一樣，同個胎唔會有咩影響。但照陰道就可以清楚d知道子宮入面嘅情況。但我哋都係堅決照咗肚皮先，可惜喺肚皮始終照唔到，迫於無奈都係要照返陰道。

老公可以一齊睇，今次我哋見到個胎囊，胎囊入面嘅蛋白同埋肥芝。今日肥芝已經有2mm大啦，而且咗見到心跳添呀。老公好興奮咁話佢見到肥芝個心跳好似救護車嘅警告燈咁閃吓閃吓。見到肥芝有心跳，我都安落d。醫生話，十個孕婦有六﹑七個都會流啡，而係流啡裡面嘅六﹑七個嘅bb都可以順利出到世。只要唔好太粗勞，有足夠嘅休息就得。

亞妹話佢問過佢中心嘅營養師，佢話我唔夠一個月，有流啡嘅情況通常都係因為子宮將之前月經未排出嘅經血清走，所以導致有流啡嘅情況，只要唔見血就可以放心。咁講又好似幾有道理喎。呢個原因我buy d，今次可以放心d啦。

急得要命

2010-06-28T23:10:00.002+08:00

今朝早一起身，發現自己流啡流得比之前厲害咗好多。嚇到我個人呆咗，淨係識得喊咋。個心一路係咁"up"住"唔好呀…唔好呀…唔好有事呀。"一路打電話比老公。老公都係一貫好老定咁同我講，叫即刻換衫去睇急症，記得要慢慢行，小心d。佢會打電話比99，去急症室搵我。

我換完衫，老公又再打嚟話99而家出咗門口。老公叫我call的士。但的士話由屋企去瑪嘉烈咁近，唔車我，叫我自己去搭街車。

無辦法，咁我唯有落樓搵的士啦，都要等咗一陣先有。我上咗車無耐，99就打比我，話佢到咗醫院，佢喺急症門口等我。落咗的士，去急症登記完，好快就到分流站到量血壓同問情況。我一五一十話佢聽，我有咗三個星期，今朝開始流啡流咗好多，同埋有肚痛。等都唔洗等就直接入咗去等醫生睇。等咗唔夠五分鐘就有個醫生帶我去照超聲波，佢話個胎囊仲係度，不過流啡佢哋都幫唔到，因為無嘢可以醫，無藥可以食，要靠個胎自己。咁我問，咁我自己有咩可以做。佢就同我講瞓多d床，唔好郁咁多，可以減少流啡。佢仲話通常咁嘅情況，有九成機會，bb都可以順利出世嘅，所以唔洗咁擔心。

但佢最後又問咗我一句，"你想唔想要個bb？"我即刻話，"要呀…要呀，我要架。"個女醫生就同我講，"好辛苦先至有咗呢！"。我點咗吓頭。心裡面諗："係呀，真係想咗好耐先有架咋。"

佢比咗張覆診紙我，聽日返去覆診。比咗兩日假我。之後我就同99返出到。果陣都未夠十點。99打比老公，老公仲搭緊的士嚟緊。

老公嚟到，我同99就上咗車，一齊返屋企。我一路都好驚，捉實老公隻手。

返到屋企，老公同我入房瞓，我忍唔住打咗個電話比亞媽，聽到亞媽把聲仲喊到收唔到聲添。最終，都係老公拎咗個電話去同亞媽講。之後，亞媽叫我每事睇開d，所有嘢都係整定架，唔好諗太多，多d休息。

啱啱嘔咗啦

2010-06-26T23:02:00.002+08:00

我終於都嘔到啦。之前聽到醫生話嘔係証明有荷爾蒙分泌比BB，有嘔好過無。所以就一直好期待自己都會嘔。

頭先食完中藥之後，一路都頂住個胃，好想嘔。折騰咗好耐，老公記得食梳打餅可以舒緩孕嘔，就諗住落街買比我。就係佢閂門之際，我就行入廁所以備不時之需。

就係呢個時候，個制就turn on咗，一發不可收拾。連老公喺走廊都聽到我嘔，即刻衝返入嚟睇吓我點。我都完全控制唔到，不停嘔，嘔到眼淚水都標晒出嚟。

嘔完一輪，終於無事啦。舒服返晒。

老公見到我好D，就啦啦聲去買梳打餅比我，等我今晚嘔完肚餓有得食。

休養中 -- 第三日

2010-06-26T20:26:00.003+08:00

今日係星期六，老公唔洗返工，我今日就更加係一個皇太后。

今日肥芝都幾乖，個肚無再痛。只係今日個胃口唔係咁好，因為口淡淡，成日作嘔。不過，記得醫生話嘔係一件好事。所以，搞到我好期待孕嘔，講起都有D變態。今日仲發現咗我個嗅覺好敏銳，我今日聞到好多唔同嘅味，但老公就聞唔到。

老公今日本來想買牛抽魚煲湯，但買唔到呀。所以，佢買咗條大眼雞煲湯。不過，都好好飲。

皇后嘅生活真係好呀。

休養第二日

2010-06-25T14:57:00.002+08:00

今日係喺屋企休養嘅第二日，今日我好小心，便便嘅時候無咁用力，真係無再流啡。唉，連便便都要忍住忍住，無法啦，因為大腸同子宮係同一舊肌肉相連。唯有唔好咁出力啦。

今朝都仲過得幾好唔錯。唔知做乜，過咗個晏晝，食完D叮叮點心。肥芝又搞事。個腺又開始有少少痛。

學亞螢話齋咁早知有好有唔好啦。早D知可以準備得好D，但早D知又驚耐D。有咩唔妥都提心吊膽。

大家都係果句，叫我放鬆D，有咗係咁架啦。不過，我就覺得緊張D好，話晒都係第一個嘛。要乜都留心D，留意多D，有咩事都可以一早知。

今日情況不妙

2010-06-23T17:35:00.002+08:00

尋晚瞓覺嘅時候，覺得個肚有D痛，好似嚟PERIOD咁。

今朝起身時，都仲有咁嘅感覺。返到公司，去洗手間嘅時候發現流啡。我好驚呀，所以，即刻走返自己位︳打電話比老公。老公喺電話度都好老定，叫我唔好擔心。我話我而家即刻要去睇醫生。佢就叫我上咗車打比佢。同老闆講咗聲，就即刻走人。

一路行，我都一路忍唔住喊。上到的士，就打比老公，眼淚忍唔住係咁流。搞到的士司機都怕我有D咩事。一路係咁安慰我，講咗好多佢遇過唔如意嘅事點樣行到今日。好多謝佢嘅安慰。

去到診所，醫生都仲未返。護士叫我飲多D水，一陣照超聲波。隔咗一陣老公嚟到陪我，我見到老公又忍唔住喊。今次又輪到老公安慰我。

到醫生返嚟，醫生話都無乜嘢，但就同我照一照，見到肥芝大咗少少。但醫生話我無嘔，唔係一個好現象，可能馱得唔係咁穩。今次咁樣流啡算係作小產。佢比咗8日假我返去休息，同埋D黃銅體我食等個子宮唔好再縮。

不過，我哋都係唔安心，特別係我。我好想去睇中醫，可以食中藥安胎。所以，唔理三七二十一就衝咗去中醫度。本來佢哋話我無預約唔想比我睇。但我同佢講，我有咗，今日流啡作小產，佢哋先肯比我睇。等咗兩個鐘，終於到我啦。

見到醫師，佢講嘅其實同個西醫無咩分別。佢比咗D醫我安胎，我問佢西醫比咗D黃銅體我，佢話唔緊要，可以食得。

聽完中醫嘅說話，有老公喺身邊，個人定返好多。返到屋企就即刻去瞓覺。

"肥芝，你要乖呀。唔好咁百厭。要攬實我呀。"
好似Daddy話齋，"請緊握扶手。"

一天都光晒

2010-06-19T22:06:00.002+08:00

今日老公陪我去拎驗血報告，我哋都好緊張。

上完韓文堂，老公去到旺角接我。食完LUNCH就上診所。

等咗一陣就到我哋啦。醫生話我哋知，個指數低過1000，所以之前果日照唔到。過咗兩日，D指數就會過3000。今日再照吓，一定要照到。

今次終於照到啦。第一次見到肥芝，佢有5.2mm大。

"肥芝，你好嗎?"

又開心又擔心

2010-06-17T21:47:00.000+08:00

決定咗返嚟之後，去醫生度CHECK。所以一早起身就打去BOOK 時間。

去到醫生度，個護士同我講："一月嘅時候同你驗完血，約你上嚟配藥，你無嚟到喎。"
"係咩，乜有D咁嘅事咩?"我都唔記得咗LU。
"今次嚟係睇咩架?"
"我好似有咗，想醫生幫我CHECK吓。"

入到診室，醫生知道我有咗，佢就即係幫我用超聲波幫我SCAN個胎，點知乜都無。醫生話不如驗多次小便啦。個TEST都係+VE........

醫生話"你嘅小便驗到你真係有咗，但超聲波又照唔到。如果係咁，我驚你係宮外孕。不如抽多次血驗啦。如果個指數OVER 3000就肯定係宮外孕。到時個胎就唔可以要架啦。"

聽完佢咁講，我真係坐唔安，食唔落。返到屋企喊完又喊。

星洲之旅-後記

2010-06-16T21:20:00.000+08:00

去完旅行啦。啱啱去完新加坡返嚟，去咗USS啦，去咗食海南雞飯啦，去咗影魚尾獅啦，去咗見我嘅表姪女啦……

其實，上機去新加坡之前嘅4個鐘，發生咗一件事。

上機前一晚，當我好開心嘅喺度執緊行李嘅時候，老公突然間問我："呢排有無CHECK過(有孕)呀?"無喎，返嚟先CHECK 啦！"我話。佢竟然話唔會，去之前要CHECK 咗先。"OK，咁聽朝一早起身CHECK啦。＂我唯有聽一次話啦。

出發前，聽老公話CHECK CHECK先……咦……咁嘅……同平時個結果唔同嘅。+VE?! 我好疑惑問老公，"咁點呀?咁即點呀?咁而家點算呀?"
點知佢又倒返轉頭問返我點。我點知點喎。

然後，老公好認真咁問我……"不如我哋唔好去旅行囉?" 我都明白佢個心點諗，但我返工真係返得好辛苦，好唔開心，我想離開吓。所以，我好唔情願。亦因為咁，老公都係屈服咗。出發……

不過，去到新加坡之後，老公所有嘢都好小心，對我亦都好細心。我知道老公好錫我同肥芝，我都好開心有個咁細心嘅老公。不過，我自己就半信半疑。所以，旅程嘅第三日我哋又再買支棒棒再驗多次。

今次嘅結果都係+VE，老公對今個結果已經深信不疑啦。但我都仲係唔係好信。經過商量，一置決定，返香港第二日去醫生度CHECK CHECK佢。

勁藥

2010-04-02T00:39:00.002+08:00

因為要浸當歸，所以今日先有藥食。

第一啖飲落去……嘩，辣嘅。好辣呀。

但無辦法，再難飲，都要飲晒佢。

就係咁飲晒第一碗藥，飲完勁"WING"……我諗我啪咗藥。

由愚人開始

2010-04-01T00:25:00.002+08:00

決定咗去睇醫生，所以唔洗一早起身，可以瞓多一陣。正。

一路好緊張咁走去見醫師，醫師又笑笑口，話"好呀，好呀……"然係俾咗張紙我，叫我睇吓有無咩唔明，唔明就要即刻問。

其實我真係唔係好明佢寫乜，真係要好留心逐隻字睇。哦……終於都明啦。

睇完醫師我趕住走，所以無拎到藥就走咗啦。老公應承會幫我。

突如其來

2010-03-31T00:18:00.003+08:00

之前去睇中醫，醫師叫我PERIOD 一到就去見佢。今晚M姐突然來訪。

噢……點算，我聽日公司仲有超多嘢做，仲要有個PROMOTION嘅MEETING要去。點去見醫師呀?!我等咗咁耐，先有個CHANCE，又係因為呢份死人工，令到我去唔到睇醫師，始終我都心有不甘。

諗極諗唔掂，又喺沖涼嘅時候喊咗出嚟。喊到收唔到聲。老公最後問我，份工嚴重定係生仔嚴重呀?諗都唔洗諗就梗係後者啦。就係咁，我哋就一致決定，聽朝睇完醫生先返工。

事情得以解決!!!

心理病

2010-03-16T11:47:00.002+08:00

之前睇過一D文章，一D電視節目，都話香港人其實大多數都有心理病，我有時都會覺得自己有情緒嘅問題。一係無厘啦謂都笑餐死，一係無端端都會坐係度喊成粒鐘。我都唔係好清楚呢D咁飄忽嘅情緒，係因為我天生雙重性格，定係工作嘅壓力，定一或係我自己好勝嘅性格，令到自己唔可以放鬆。

最近，我老公同我講得最多嘅一句係，"睇開D啦。"乜我真係好睇唔好咩?!

應該都算係。就好似今日咁，喺屋企WORK FROM HOME, 無人喺我身邊，我又開始亂諗嘢，坐咗喺度喊成粒鐘。歸根究底都係自己嘅EQ太低，當自己好想得到，做到一D嘢嘅時候，同時發理自己根本無辦法去得到﹑做到嘅時候，個心就會不奇然有一種焦急。呢種制止唔到嘅焦急好快就會變成一種恐懼感，令我覺得無助。為咗要宣洩呢種不安嘅情緒，唯一可以做嘅就係喊。

不過，喊有時候只係將我嘅不安轉駕咗比我老公，好彩老公EQ比我高，佢知道好多事唔可以強求，強求唔到嘅就應該要睇開D，放鬆自己去面對。

我曾經有諗過要去睇心理醫生，但又覺得好似太誇張，最後都係無去到。算啦，人就係咁架啦，最叻就係幫自己搵藉口嘛(係"求婚大作戰"嘅天使講架。)。

No bad news is a good news

2009-09-06T23:40:00.002+08:00

星期五放咗半日SICK LEAVE，因為完咗PERIOD，要返醫生度覆診。因為係平日，老公要返工陪唔到我去，所以我要自己一個人去。

其實，今次去覆診都好緊張。因為係試食咗第一排避孕藥之後去做檢查，睇吓D避孕藥對我係咪真係有效。如果無效嘅話，就要試第二樣。

今次去到，又係例牌等醫生半個鐘有多。入到診症室，我就講返晒我食完藥之後嘅情況比佢聽。因為我食完D避孕藥之後，右左邊都痛得好緊要，痛到我有D想嘔同暈嘅感覺，但醫生竟然同我講，女人有經痛係好正常嘅事，好多人都係咁架啦。

跟住佢就同我CHECK 超聲波。今次見到個卵巢真係無之前咁多泡泡啦。醫生話D避孕藥對我起作用，令到D泡泡消咗好多。佢話照咁睇，我之前應該係荷爾蒙分泌唔平衡，所以先會有咁多泡泡。佢建議我食多兩排避孕藥，等所以泡泡都清晒，先再食排卵藥。

不過，我同佢講每食完一排藥係咪會嚟一次經，佢話都係架，不過就唔會有排卵住囉。但我話食完藥嚟經會好痛架喎。之後佢竟然同我講，其實好多人都經痛架啦，要生完仔先至會唔痛架。如果我唔想生其實都唔洗食嘅，咁咪唔洗痛囉。吹脹。我唔想嘅話，洗乜嚟睇醫生呀。我話咁又唔好，應該都係痛多幾次架啫。希望我真係可以開口中啦。 ^_^

Good Handling

2009-08-29T10:40:00.005+08:00

I 've got a new that my friend's wife is pregnancy. I am sure that would be a shocking news for me if I heard that few weeks ago. However, it is not as shocking as I supposed. Even my friend kidded me for asking any pressure from that. I replied gently, "There is something is out of my control, and just let it be." After I said that, it surprised myself as well. I doubt whether I do what I say, really?

In fact, I should say that I was thinking too much on such topic in the past few months. I did not only push myself hard, but also Siupang. It's not fair and is cruel to him.

Just like bible mentions, people can see what they miss, but not what they have. Yes, I agree with that. I also recognize I am the one too. I just focused on what I eager and what I miss. And, I forgot to appreciate what I have.

Actually, I am lucky what I should say. I have a good family. They are forgiving, and love me most. I have an excellent husband. I have a good job. I can earn and pay myself. I have my own flat. I have my friends. Words cannot help to describe what I have completely.

I should be happy, why not? There should be something wrong in my mind. I am trying to pick the negative thinking out, clean up my mind, enjoy my life, and share my joy and happiness to people all around me. Yes, that's what I was born to, I believe.

好煩呀……煩死我啦。

2009-08-23T15:40:00.004+08:00

唔好再問我幾時生呀。邊個會識答呢條問題呀。

正如我問你幾時發達同幾時死一樣。有邊個會識答呢D問題。

做乜要我"恨"吓?!

2009-08-23T15:32:00.002+08:00

你有個孫又點呀?
咩叫比D相我睇等我"恨"吓?!
"恨"同"唔恨"咁又點?

你有個孫我都好登你開心，比D相我睇咪比囉，做乜要講句咁嘅嘢呢?
咁大個人都口不擇言。

鍾意曬龕咪行出街曬囉，無人阻住你，行出街瞓喺度曬啦。

佢又有……佢又有……點解我無……

2009-08-12T22:27:00.002+08:00

佢同我講：『幫我BB 改返個A字頭嘅英文名呀……』
佢同我講：『你話我個女叫"諾彤"好，定係"翱晴"好呀……』
佢同我講：『揀咗8月15號喺養和開刀生呀……』
佢同我講：『今日已經係37週5日啦……』

點解唔係我講…點解唔係我…點解唔係我…點解唔係我…點解唔係我…點解唔係我…點解唔係我…點解唔係我…點解唔係我…點解唔係我…點解唔係我…點解唔係我…點解唔係我…點解唔係我…

點解我要食避孕丸…點解我要排期…點解我要覆診…

點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…點解…………

繼續發燒

2009-08-08T00:13:00.002+08:00

今朝起身成身無力，探咗熱89.X度，老公叫我唔好返工。點得呀，應承咗今日完個UAT，仲差一個JOB FLOW，成四頁紙架，都無行。諗住返去都係吩咐個廣州同事做，自己可以唔洗出咁多力。所以就爬咗起身返工啦。

誰不知個廣州同事，吩咐咗佢做。做完一次，四個鐘，洗唔洗咁耐呀?!點知原來中途已經錯咗，又唔CHECK LOG，係咪玩嘢呀。OK!我MON住你逐個JOB 做。四個鐘之後，見到個LOG都仲係有D問題。明明USER比嘅INTERFACE有4個，點解只係GENERATE到2個架。4個鐘又4個鐘，唉，再搞落去都唔知會唔會收唔到工。都係我自己嚟啦。

六點鐘開始病住嚟做，八鐘幾就行晒D JOB。仲要執返晒廣州同事D甩漏。早知係咁今朝一早自己做啦。起碼都仲可以有多兩個鐘做自己嘢呀。而家我D嘢都仲未做晒，星期一返去又要執返自己壇嘢，係咪玩嘢呀。

放工返到屋企都十點啦。好在老公煲咗粥比我食。佢仲買咗尋晚買唔到嘅退熱貼比我呀。我返到嚟再探吓身溫，又99.X度啦。又燒過啦。 -_-

發燒添

2009-08-06T22:02:00.002+08:00

今次發燒果個係我呀。今朝已經喉嚨痛架啦，返到公司忙完一日之後，頭暈暈咁樣返屋企。覺得個頭重重，探完熱，99.4度。我諗都算係發燒呱。

食完飯個人呆呆地，有D作嘔。老公摸到我個頭好熱，落咗街買退熱貼比我。佢只係比我上網一陣咋，佢買完返嚟，我就要瞓覺啦。不過，我個頭真係好重呀。

覆診2

2009-08-04T20:36:00.002+08:00

去完澳洲之後，去咗韓醫生度覆診。上次醫生比咗D通經葯我，叫我一嚟就要約時間覆診。可惜，我嘅情況真係好難搞，m都唔m吓。

所以，我自動自覺去約醫生，再睇吓點情況。醫生今日同我再照多次超聲波，話我兩邊都仲係好多泡，一定要清晒佢先得。佢比咗一排避孕藥我，話避孕藥可以抑壓住D泡泡同等D泡泡自己收返。如果食避孕藥唔得嘅話，就要打停經針，都仲係清唔到嘅話，就要做手術或者食糖尿藥。目的都係為咗清晒D泡泡。清完D泡泡就可以食排卵丸啦。

雖然我好唔想食避孕藥，但如果真係可以清到D泡泡，可以快D達成我哋兩公婆嘅心願。呢步一定要行架。希望一排避孕藥就可以啦。

麻煩嘅根源

2009-08-01T12:05:00.002+08:00

今日本來可以同公司嘅同事去釣墨魚架，但係撞正太奶奶生日，無緊要我都好鍾意同親戚食飯傾計，所以我無JOIN到公司個墨魚團呀。

本來今日心情都唔係幾好，尋晚又瞓唔著，一早五點幾就起咗身。無問題，咁咪去食早餐囉。事原今日要做BODY CHECK，八點後就唔可以再食嘅架啦。所以，一早就食咗先。

返到嚟，我去練琴，老公去再瞓過。奶奶約咗老公幫手拎嘢去太奶奶度。奶奶十點度打嚟，約實老公之餘，又嚟搞我。無啦啦又同老公講，叫我今晚去食飯要酙茶比太奶奶。我心諗：又酙咩茶呀，都結咗婚半年有多啦。次次見親都酙茶，酙到幾時呀。上次舅公生日又酙茶，個心都覺得有無搞錯呀，結咗婚五個幾月啦，又酙茶，結婚果日都已經酙到跪喺地下無起過身咁制，有咩人都酙晒啦。OK, 上次老公話酙埋比舅公，以後都唔酙。佢講得咁型，我梗係信佢啦。

點知今日奶奶又酙茶癮起，又叫我酙茶。老公聽完同我講，睇我反應。我即刻唔好老脾。又係你話酙埋上次嘅，今次你唔係會幫我推你亞媽架咩?!OK，你唔推我，但我話我唔酙囉，成日都酙，酙到幾時啫，姑姐都有新抱，又唔見人哋次次出嚟食飯都酙茶。點知老公話你唔酙不如唔好去食飯喎。喂，大佬，而家個問題喺我度咩?我做乜要唔去食飯呀，仲有我又推咗唔去釣墨魚出席家庭活動，到頭來你叫我唔好去。咁我去邊呀，一個人食咩呀? 火都嚟。仲有呀，而家個問題係亞奶奶成日都要我酙茶嘛。我避得一時都唔避得一世架，唔通以後都唔出度家庭活動呀?我又無做錯嘢。

最後，老公打返去同奶奶講唔酙茶得唔得。我唔知奶奶喺電話度同老公講乜呀，淨係聽到老公話今晚要酙茶嘅話，咁我哋今晚唔嚟啦。佢哋再講咗一陣，老公同我講今晚唔洗酙茶。

唔知奶奶會唔會覺得我好唔聽話呢?不過，唔酙茶就叫唔聽話，咁我只不過係之前聽得話太多，所以而家學會唔聽話囉。

憂心忡忡

2009-04-01T23:45:00.002+08:00

上個星期尾，同Amanda傾咗一陣SameTime，都係傾吓D女人嘢。之後就抽起條根去做一個婦科檢查。大致都無咩問題，只係醫生同我講咗D嘢，令到我到而家都仲係好擔心。

其實，個醫生一見到我，咩都未做，只係睇咗我嘅個人資料，就同我講仲唔生就好難生。我諗係因為呢個醫生比較傳統，女人三十出頭，都好應該做媽咪。所以佢咩都未做，就咁同我講，我覺得佢有D先入為主。我去做檢查係想了解自己身體多D，我明白我要聽取醫生嘅意見，但都唔可以有佢講無我講。

但議是論事，我好清楚醫生係以病人為大前題嘅立場。佢所講嘅所有嘢我都會聽，就係因為咁我就更擔心我嘅情況。我講唔出我有幾擔心，但每次諗起眼淚都忍唔住。但我同老公講完，老公覺得好似好小事，係咪我太過緊張呢。不過，正如我講啦，我相信醫生，而我更相信我老公，我相信有咩事佢都會喺我身邊。

要做足準備

2009-02-19T23:14:00.002+08:00

啱啱結咗婚一個月多少少，啱啱好辛苦咁(我覺得好辛苦架!!!!!)趕起咗個PROJECT。

所以都係時候PREPARE NEXT STEP。今日買咗一樽葉酸，一樽有100粒，每日食一粒。如果可以如願以償的話，應該食兩樽度啦，就可以食下一種啦。但喺呢個時候，仲要去做個全面嘅身體檢查。不過，我好驚做全面嘅身體檢查架。可能係亞媽由細到大嘅歪理灌輸，"無事無幹檢咩查呀，一陣查到有事又擔心又要醫，無事嘅又晒錢"。一直潛移默化，我都好怕到時CHECK到有咩事，都唔知點算。

不過，為咗屋企，我點都會去做個FULL BODY CHECK嘅，希望一切健康同埋早日達到目的啦。阿里吉帝。

第一個年三十晚

2009-01-25T23:57:00.002+08:00

農曆新年過咗廿幾個啦。今年係最特別嘅一年，因為今年係第一年要執自己屋企，有好多嘢要執要洗；第一年要派利是，都唔知要封幾多，老公話封定D，唔夠遲吓再封喎；第一年辦年貨，同老公兩個要諗送咩比D長輩。

我哋兩個仲著咗紅色睡衣，希望今年老公賺多D錢啦，心想事成啦，步步高陞。最緊要都係身體健康。

放假啦.......要派利是呀

2009-01-23T23:47:00.002+08:00

終於都要過年啦，趕咗一個禮拜PROJECT，捱咗一個禮拜夜。終於都可以放假啦。我就當然辛苦啦，但我肉痛嘅係我老公呀。每日我做到幾夜，老公就陪我陪到幾夜，真係辛苦咗老公啦。

老公除咗陪我陪到好夜，佢仲差唔多晚晚都煮飯等我，仲留埋飯我第二日帶添。仲有洗衫啦，洗碗啦，真係一個無敵好老公呀，好冧呀。

唔只咁呀，有一晚我喺屋企做公司嘢做到無晒心機，走入房練琴。練琴之前，同老公戲言咗一句，"你坐喺我隔離，陪我練琴。"點知老公真係乖乖咁坐喺我隔離一路陪我。搞到我都有D覺得自己刁蠻。

我真係就嚟比老公縱壞啦，好幸福呀。 ^^

人唔知足……尤其係女人

2009-01-13T23:42:00.003+08:00

婚後嘅生活，只有兩個字可以形容--"美滿"。

老公真係一個好男人，一個好錫老婆嘅老公。大家都一樣要返工，佢都只係比我早個幾鐘頭放工，就主動返屋企煮定飯。我今日返到屋企，已經準備好晚飯可以食啦。我只係乖乖咁幫手擺好碗筷，由廚房拎餸出飯廳。仲好好味添呀。

而家嘅生活真係--我敢講一句，"我好幸福呀。"

不過，都話人係唔知足嘅，我當然仲有唔滿意嘅地方啦。但唔滿意嘅地方絶對唔關老公事。係我唔想再要趕PROJECT啫。如果可以唔做CTI呢個PROJECT。我嘅人生真係幸福到爆呀。

婚後一個星期

2009-01-12T00:09:00.004+08:00

咁快就過咗一個星期啦，好幸福嘅一個星期。仲好似發緊夢咁。

鵬爺仍然係鵬爺，而家已經係我老公，比以前更錫我，更照顧我嘅老公。
屋企人仍然都係我屋企人，而家比以前多咗最少四個好親嘅家人，外冷內熱嘅老爺，賢妻良母型嘅奶奶，獨立同善解人意嘅姑仔小琼。

每日起身都有老公喺身邊，除咗返工，老公無時無刻都陪住我，去街拖到實，坐車"挨"到實，瞓覺摟到實，有一個人咁錫自己，咁保護自己，感覺好好，真係覺得自己好幸福，幸福到一個自己都唔相信嘅地步，好怕有一日夢醒。

如果呢個真係一個夢，就讓我們一輩子，甜甜的一同沉睡下去。

+++++++++++++++++++++++++++++++++++++++++++++++

老公今日陪我去科大影畢業相，今日好凍呀，朝早得九度，係2009年最凍嘅一日。明知科大會好大風，好凍，老公都仍然陪我去影相，仲要做我嘅攝影師添。
然後，就同我去咗九龍灣行街，仲買咗個鋼琴，星期六就會送嚟啦。

從細到大嘅願望，都慢慢地成真。都係因為有一個對我好好嘅老公。 ^_^

仲有四日咋

2008-12-31T00:01:00.003+08:00

仲有四日，我哋就要結婚啦。眼前仲有好多濕濕碎碎嘅嘢要做。但果D都好閒。今日有幾個姊妹拎咗姊妹裙啦。之前件件姊妹裙唔係大咗一個碼，就係細咗一個碼，都無件係啱身，真係好驚間姊妹裙間舖頭改唔切。幸好都總算出路遇貴人，亦都好彩有一班姊妹幫手咋，佢哋咁落力，真係好多謝佢哋，令到我煩少咗唔少嘢。真係好多謝好多謝呢班靚靚姊妹。

仲要返埋聽日，我先可以放假，終於都可以暫時放低公司果D做極唔完，SCHEDULE TIGHT到無可再TIGHT嘅工作，專心搞自己嘅婚禮。講開我都有一點點唔忿氣。我早於一年前已經講咗比我個PM聽，我2009年頭會結婚，但到頭來都係有一個時間緊到無氣抖嘅PROJECT ASSIGN咗落嚟。我心真係有不甘，有D覺得因為公司嘅工作，令到我一世人一次嘅婚禮未總完美。

我都好多謝有一個咁體諒我嘅未來老公仔，佢真係一個人做咗好多嘢。佢知我公司忙，都盡量唔洗我做咁多嘢。佢真係好好，我都唔知可以講D咩去多謝佢。好感激佢咁包容我。

呢個婚禮我真係要好感激身邊一班勞心勞力嘅姊妹，仲有一手包辦，樣樣事都會盡可能親力親為嘅新郎哥。好多謝你哋。

迫在眉睫

2008-12-06T22:47:00.002+08:00

仲有唔夠一個就大婚啦。目前知道未完成嘅仲有一大堆。

今日先有時間約第一批姊妹去揀姊妹裙。有一個奇遇，原定想去造裙果間舖頭，想行入去嘅時候發現有一對男女企咗喺門口阻住去路。原來佢哋係嚟拎姊妹裙，但仲未有得拎，個女嘅好大聲咁喺門口講，"仲未有得拎，已經遲D成個禮拜啦。日日都嚟催，日日都話聽日，都唔係路架。"然後就打比佢個結婚朋友講，"你間造姊妹裙果間嘢唔掂喎，我到而家都仲未有裙攞……"聽到呢度，我同兩個姊妹對睇完，即閃啦。

好彩我哋行得慢咋，唔係遲D企門口講同樣說話嘅，可能係我哋啦。

講返我果筆。其實都唔係咁順利。因為我之前因為太多嘢做，同埋又將呢件事懶懶閒咁放埋一邊，搞到今日先去揀姊妹裙同造姊妹裙嘅舖頭。佢都好老實講，我好趕喎。佢會盡趕比我，不過要呢兩日，比晒D姊妹嘅尺寸嘅。死火嘞，YO YO未返喎。我話我仲有個姊妹喺美國，佢就教咗我點樣去度尺寸，然後再話返比佢聽。咁我唯有遙控YO YO 自度啦。仲要麻煩多其他姊妹聽日要去間舖度度身添呀。我都自覺有D擾民。真係好唔好意思。

弊啦，仲有一個姊妹未聯絡去度身，唔通真係要我返公司同佢度?!

Finalize D婚紗啦

2008-12-02T01:45:00.003+08:00

今日喺公司度接到個惡耗，我結婚前都唔會有好日子過。ANYWAY，我都總要嫁人。所以，照原定計劃放工之後去咗揀婚紗。

去到等咗半個鐘，講真我有D唔耐煩。BOOK咗時間都要等，咁你就咪叫我呢個時間上嚟啦。又無SERVICE過我，又唔話我聽等咩同等幾耐。你算點。我都知我今日燥底，所以，我一路都忍住唔出聲。

終於都到我揀啦。其實之前都Roughly揀過一次，今次都只係返去CONFIRM返DCHOICE。今日發現自己都唔係一個花心嘅人。我仍然最鍾意自己揀咗嘅婚紗，晚裝都仲係果幾件，只係今日見到一件藍色晚裝，突然眼前一亮愛上咗佢，所以佢而家暫時都ON LIST。不過佢其實比人RESERVED，不過果位新娘只可以二揀一。如果佢唔揀呢件藍色，佢就係我架啦。

仲有，伴娘ALICE都揀咗衫啦。我見自己試衫試得咁好開心，而鵬爺又得一件，所以我就特准佢可以要多件男禮。免得佢以為無人理佢。鵬爺喺呢個籌備婚禮呢個過程付出咗好多時間同心血。我都希望佢有一個難忘嘅婚禮。婚禮中都會比人讚佢有型。

希望各位識做啦。

終於入咗伙啦。

2008-11-30T00:13:00.003+08:00

由九月到而家，終於都等到入伙呢一日啦。

以前成日都諗，同鵬爺一齊住會係點架呢? 唔知會唔會因為困埋同一間屋，所以嗌交呢?唔知會唔會爭廁所用呢?唔知會唔會嫌我嘈呢?仲有，好多好多嘅"唔知會唔會……"。到咗今日要入伙啦，我等到啦，好快就知道我想知嘅嘢會唔會真係發生。

但喺臨入伙之前三日，竟然話比我聽，結婚前張床唔准瞓。結婚前我唔准搬入去住。點解呀?答案又係"係咁架……"咩係咁喎?!係咁又點喎。我屋企喎，要人哋批准我先可以住。我個心真係有D唔分氣。不過，鵬爺同我講咗一句，"都只不過係幾個禮拜嘅事啫，做乜要搞到大家唔開心呢。"我覺得佢講得都啱嘅。大家做咁多嘢，都係想我哋兩個第時過得好D，我無理由又因為自己嘅任性，唔理其他人嘅一番心意。

不過，得鵬爺一個喺新屋度瞓，我怕佢會寂寞喎。等我哋諗個好辦法，可以令鵬爺唔洗咁慘孤零零先。

不過，未有得住還未有得住，但入伙拜神就一定要做架啦。今日上到去，先拜神。喺屋入面燒衣今日都係第一次。因為屋企比較通爽，所以D灰好快就飛到成屋都係。拜完神就要開始清潔，除咗掃灰之外，仲要抹屋啦。之前都抹過晒全屋嘅窗台，今日就要搞搞個廁所嘞。我咁大個女，今日都係第一次洗廁所咋。不過見係自己嘅屋企(真真正正屬於我嘅屋企)，無計啦。好在仲有鵬爺﹑鵬爸同鵬妹幫手。今日都唔算抹得好辛苦啫。

不過，我今日清潔得攰得滯，喺床度瞓著咗呀。唔知咁算唔算犯晒規呢。 =p 弊傢伙。

最難嘅事情……為著自己嘅幸福，都要做。

2008-11-13T22:30:00.003+08:00

終於都FINALIZE咗本相簿啦，我同鵬爺尋日捉住咗個DESIGNER幫我哋執過D DESIGN，執到我哋都滿意為止，都搞咗成兩個鐘有多。好攰，但總算了咗一件心事。

而我近排就開始煩緊第二件事。喺鵬爺嘅威迫下，我終於都要去搵姊妹啦。一路都唔肯去做呢件事，係因為我嬲咗一個好老死嘅FRIEND。好唔想喺咁嘅情況下去求人做我姊妹。所以我去咗搵一個我哋都相熟嘅朋友先，我向佢和盤托出咗件事，佢話我講嘅嘢，佢雖然在場，但佢完全無印象，仲話我係白痴仔。我無嬲佢咁話我，因為我自己都有同感，但我又真係偏偏下唔到呢啖氣。

所以，我嘅姊妹就係差佢哋未搵。因為我一路都未諗到要點開口。哎……女人，你真係自找麻煩。

為新屋張羅

2008-10-26T23:29:00.002+08:00

買咗層樓咁耐，心態上一路都唔覺得有D咩唔同。

直到今個月，我嘅心態一百八十度大轉變呀。
首先，第一次要交管理費，由於無留意原來上手業主留返九月份嘅管理費比我哋交。所以十月份就要一次過交晒九月同十月，差唔多要成二千蚊。肉都赤埋呀。

第二，我今個月開始要供樓啦。份糧都未到手，就比人扣咗D錢去供數。我做咗成個月咁辛苦，比d錢我摸吓先都好呀。心痛死。

因為鵬爺嫲嫲幫我哋揀咗日，十一月尾至十二月頭就要入伙。所以，我哋呢兩日都去confirm晒D之前訂落嘅嘢。發現張床褥有成十三吋咁高，所以今日去買床笠嘅時候都要揀king size。confirm 咗張sofa。睇中咗個電視櫃同鞋櫃。今日見到Jusco廿一周年大減價，就去咗見吓有咩啱。仲買咗個竹砧板﹑水煲﹑旅行喼。從來都未試個成師奶咁周圍格價，睇呢個將呢個師奶行為變成自己嘅一種習慣，並要樂此不疲，令自己成為一個百分之八十嘅師奶。仲有兩成就要等我，愛上去街市買餸，同煮得一手好餸嘅時候先可以合併入去啦。

完成重大任務 II

2008-10-25T01:36:00.002+08:00

繼我哋千辛萬苦影完D婚紗相之後，我哋終於收到相啦。比我哋想像中靚好多。真係好靚，令到我哋都揀唔落手去揀D唔要嘅相。最終，我哋要晒。不過，真係好靚。好開心呀。我不停睇完又睇，睇完又睇。簡直就係正呀。

買龍鳯鈪

2008-10-20T01:24:00.003+08:00

今日鵬爺相約咗鵬媽去買嘢，咩事咁嚴重。就係幫我呢個女主角買龍鳯鈪囉。
其實，係因為有好幾個原因素驅使我哋今日出動。
第一，因為金價稍為回落咗少少，所以令到鵬爺有今次行動嘅衝動。
第二，因為鵬媽之前供落咗D金會，而家就係佢嘅收成期啦。
第三，因為呢排經濟實在太動盪啦，所以D錢擺喺人哋度(金會)，不如用喺自己身上(即買嘢比我)
第四，因為我哋嘅好日子都快到啦，就快過大禮，所以……行動啦。

我哋今次嘅行動，有二個主要嘅目的。一，用咗D金會佢。二，揀我哋過大禮要用嘅四金：龍鳯鈪﹑耳環﹑頸鏈同介指。揀好咗四金，對鈪都幾墜手同幾靚架。再計吓條數。鵬爺計完發現買咗對龍鳯鈪先係最抵，所以就決定買咗對龍鳯鈪先嘞。其他就等金價再跌D先啦。
仲有呀，我覺得今次買呢對鈪係無錯架。因為佢個價實在太好意頭啦。

工廠開工la~

2008-10-19T17:54:00.000+08:00

今日工廠終於開工啦，兩個工廠妹努力咁做，整咗成百封。但仲有百幾封，要努力d。作為廠長ke我，更係"目及"住佢地啦，唔好比佢地偷懶la。

裝修前

2008-10-11T21:24:00.001+08:00

廚房同廁所~

上手留低，都可以用住先ke~
工場~

大電視同掛住睇電視ke肥妹~

我哋嘅屋企呀

2008-09-24T23:32:00.002+08:00

由於尋日打風所以無得拎鎖匙，今日我同鵬爺就約埋放工一埋過去地產舖收鎖匙。

拎咗鎖匙，去食個晚飯慶祝吓。跟住就係重頭戲，上樓開門啦。

我哋終於有我哋嘅屋企啦，我哋可以慢慢諗吓點樣裝修。

本來今日做業主架

2008-09-23T21:37:00.002+08:00

點解d颱風咁準架，次次唔係我影相嚟探我，就係我收樓嘅時候嚟。

人哋原來今日去拎鎖匙做業主架嘛，點知又比"黑格比"整蠱。要等到聽日先可以去攞鎖匙啦。 =(

影到啦，影到啦

2008-09-20T23:00:00.001+08:00

等咗五個月，改咗四次期，終於都比我同鵬爺偷到一個星期六去影婚紗相啦。

臨影相之前果日都仲落緊大雨，所以星期五當晚都仲係好擔心。好在，皇天不負有心人。星期六果日不知幾好天呀，有晒我哋想要嘅藍天白雲，陽光普照。

我就梗係勁開心啦。其實之前果晚都唔係好瞓得著。今朝就一早出去同鵬爺食早餐。坐低咗，落埋單，先見到鵬爺拖住個喼行入嚟。叫完嘢食完，就行過去影樓。上到去淨係見到化粧師(Iris)。我哋坐咗一陣，就換衫同化粧，鵬爺就趁我化緊粧嘅時候，去花壚拎花球。

佢返到嚟，見到佢成個人濕晒，我仲以為落雨添，原來係天口太熱，所以搞到鵬爺濕咗身呀。等我化完粧之後，就輪到鵬爺啦。Iris幫佢整咗個好型仔嘅頭，可惜爺鵬天生麗質，髮質柔軟。無幾耐，d頭髮就跌返晒落嚟架。

十二點幾度，等鵬爺食完三文治之後，我哋一行六人就坐車到大埔嘅火車博物館。烈日當空，一行出車就已經想標汗。眼見鵬爺要扮型仔，著住件背心﹑腰封同外套，見到都熱呀。影相時候果陣熱法，真係非筆墨可以形容呀。但果日除咗我哋兩個之外，仲有第二對新人喺果度影相喎。

影完火車博物館，就去大埔海濱公園。去到鵬爺就即刻換返件便服，成個人鬆晒。我哋準備再開始影相嘅時候，又見返火車博物館對新人呀，真"轎"。唔知會唔會同一日結婚添呢。

海濱公園我哋都玩咗成兩個幾點，喺太陽落山之前，我哋就出發去下一個目的地--汀九橋。呢次到我換衫啦，我換咗件晚裝，換過個粧，再ready。我換粧嘅時候仲比一大堆蚊調嬉呀。

辛苦完一日，終於都影完啦，了咗個心事，成個人輕鬆晒。yeah~~~~
至於d相呢，就到時拎咗再比大家睇啦。

請帖DIY

2008-09-09T22:44:00.002+08:00

Step 1

Step 2

Step 3

總共打咗二百五十個.......好攰.......... (X_X )

山水有相逢

2008-09-09T00:02:00.002+08:00

今日鵬爺少有地喺office hour call我，原來係個地產經紀打比佢話個業主想遲兩日先交樓喎。

我同鵬爺真係睬佢都傻呀。當日，佢企得咁硬唔減層樓，簽約嘅時候都比佢遲兩個禮拜先交樓，仲要遲，我交租比你繼續住好無，傻傻地。早知當日留一線，今日咪好相見囉。唔係我唔想幫佢，不過佢真係唔抵幫嘛。一係咁，佢交租啦，一個月按金，一個月上期，再交埋呢個月嘅租啦。再唔係撻訂啦，都係賠個double啫。

佢話佢搬唔切傢俬，咁我d傢俬呀﹑電視呀﹑床呀……夠唔可以放係倉咁耐啦，我夠趕住裝修搬入去住啦。佢都要幫我諗吓先得架。佢急，我又何尚唔急呢。

己經係第四次啦……

2008-09-03T10:39:00.004+08:00

估唔到人哋話："一不離二﹑二不離三"啫，而我哋就一共中咗四次。以統計學嘅角度，要連過四關嘅機會率係十六分一，即係6.25%。換句話嚟講，一百次先有六次多少少，而我哋己經中咗四次，都唔知算好彩定唔好彩。

講咗耐咁，咪又係講緊今日又落雨啦，影婚紗相呢個task，又要再排過期啦。真係令人費神﹑同失預算呀。

Anyway, 我哋仲有4個月就完成整個任務啦。加油呀!!!!

聽日．．．．．．

2008-09-02T20:32:00.003+08:00

聽日好天~聽日好天~聽日好天~聽日好天~聽日要好天呀～～　
（０－０）

I am ready~~

重拾心情

2008-08-20T20:56:00.002+08:00

經過一個月擔心、四圍揾酒樓(好似F.5 放榜咁)ke生活，而家終於鬆返口氣。君豪會單野settle咗，一齊如常，而且仲多咗$5000優惠tim，真係"唔知阿邊個唔見咗隻馬，都未知阿邊個是禍是福"。而家都係時侯重心情準備婚禮，新居，同埋減肥la.....

仲有下個月又去影婚紗相。近排個天好籃，d雲又白雪雪，應該會幾靚。 : )

為新屋做準備

2008-08-18T23:00:00.002+08:00

雖然仲未收樓，而且仲未諗好間屋點裝修，不過，我哋已經急不及待為新屋買咗一件新嘅用品，就係40" LCD 大電視。點解咁早買，因為我哋一早睇中咗囉，因為佢 fix 晒我哋屋企囉，因為佢加送一部 DV囉，因為鵬爺比我話事囉，因為我話要買囉……就咁就買咗啦。

雖然唔係咩大件事，但覺得一步步邁向我哋嘅兩人世界新生活。^_^

一個月之後

2008-08-09T12:57:00.004+08:00

咁快就過咗一個月，都無update過d咩，無他，因為所有嘢都無咩進展，尤其係酒席。話說君豪會喺租務問題上，法庭裁定君豪會敗訴，需要即時結業，唔可以再於九龍展貿中心再做生意，初時聽到呢個消息，真係有d失望﹑慌張﹑迷失……事緣我喺裁決未公佈之前，已經嘗試搵其他地方擺酒席，但一直都搵唔到。如果真係無咗君豪會呢個場，我諗有七成機會要改日子擺酒，咁樣嘅話就大件事，因為金錢上，一定會大失預算。

後來，君豪會同業主達成協議，君豪會以雙倍嘅租金，租用九展直到09年3月31日，於該日子前嘅酒席宴會都可以如期舉行，換言之，我哋仲可以喺果度擺酒。不過，始終有少許不安。因為得知有大約一成多嘅新人對君豪會已經失去信心，唔會再如期喺君豪會擺酒。咁樣，我就開始擔心，君豪會支出多咗，同時又失去咗一部份嘅收入，係咪真係可以維持到下年3月呢。雖然，君豪會曾揚言會有一千萬嘅信託基金，用以保障我哋呢d繼續於該會擺酒嘅新人。如果該會真係倒閉，會於該基金退還我哋嘅訂金，不過，09年嘅新人不足15對，喺沉重嘅租金支出底下，在商言商蝕本嘅生意有邊個生意人會做。其實，佢做到08年12月31日關門的話，佢要賠嘅訂金都不足一百萬，用信託基金賠完呢d訂金之後，君豪會都仲可以安然袋返果九百萬，但佢已經可以慳返最後三個月嘅租金﹑水電費﹑人工同材料錢。係咁嘅話，呢三個月係咪仲有需要做落去呢?

我而家真係好擔心唔可以如期喺君豪會擺到酒。不過，喺呢件事上面，都要好多謝我嘅master 同學Karmen，佢比我仲關心呢件事嘅發展，好多消息都喺佢話比我聽，同埋佢都好幫手搵新酒席。真係好唔該佢。

不過，呢個月都總有d開心事，我哋層樓嘅嘢，都搞得七七八八啦，仲差最後一步收樓，然後就係裝修，我哋好積極咁設計緊我哋嘅安落窩，同去睇傢俬，(其實，得我一個積極睇傢俬)，不過，我眼光無男主人咁好，所以我睇中嘅，都仲要鵬爺approve先得。好在距離收樓仲有個多月嘅時間，所以都仲可以慢慢揀。 ^_^

有待跟進

2008-07-09T21:48:00.002+08:00

話說，鵬爺對睇中咗嘅A單位志在必得，所以我哋喺啱啱過咗果個星期六，重鎚出擊。終於都買得心頭好，算係了咗一件大事。但事情無風無浪你就唔覺得佢珍貴架啦，今日喺呢件事上面有少少插曲。但而家不便透露，等我搞定咗先再慢慢同大家講啦。

第二樣係我哋大算擺酒果間君豪會，租約出咗少少事。我哋問過間君豪會佢話佢哋嘅律師進行緊法律行動，同埋申請緊禁制令，唔會比合和呢個業主再惡意中傷佢哋。不過，我都仲未係好放心，我打算聽日親身上去一趟。我先會放心。

其實，有鵬爺嘅SUPPORT，我已經放心咗好多架啦。希望眼前呢兩件事，可以快D搞掂啦。

睇樓篇 2

2008-06-22T23:30:00.000+08:00

今次要去睇嘅係港灣豪庭。

點解會睇港灣，第一佢近住小鵬而家住緊果度，第時返屋企食飯都唔洗咁遠，都係最老套果句-- 有個照應。第二，係一個權宜之計，因為我哋睇中咗月海灣，不過個業主唔敢減價，咁咪拖吓佢，等d樓價再跌吓先喎，小鵬教嘅，醒呀呢。^_^

不過睇咗八九個單位。唔係西斜就係太細，向南嘅就得樓景。一d都唔吸引。所以，我都睇完之後都無商量過，鍾意邊個單位多d。因為我哋一個都唔鍾意。

就係咁，我哋更加鍾意月海灣，所以我哋會更落力去睇月海灣。而家睇中果個係A單位。不過，佢比我哋想像中貴咗D。我哋仲劈緊佢價。不過，嚟緊會仲有一個高層少少嘅單位。同埋，嚟緊加息，正啦。樓價仲唔減係我哋再劈佢嘅時候啦。YEAH……

睇樓日

2008-06-15T22:05:00.001+08:00

今日肥妹學完琴，我地就去咗月海灣睇樓。我地一口氣睇咗八間樓。

BLK 1

10樓 B室 230M (開揚景)

20樓 F室 244M (樓景)

21樓 B室 243M (豪裝，開揚景)

25樓 E室 208M (山景)

38樓 C室 255M (超開揚景

BLK 2

9樓 B室 228M (間屋改咗一房，業主好NICE，同埋間屋上過蘋果日報)

17樓 F室 208M (樓景)

39樓 D室 248M (隔離有地盤起公屋)

最合心水係21樓 B室，有景又唔洗裝修，但價錢就貴咗D~而E同F室就唔會考慮LA，都無景KE。唔知樓市會唔會下跌LE (-O_O-)'

睇完樓睇埋個會所，有GYM ROOM, 泳池，燒野食，桌球，乒乓球，桑拿同一個係咁轉KE按摩池(但樣樣都要比錢BOOK)。管理費就HK1.5，都算OK。交通就唔係咁就腳KA LA，唔係都無咁平。但都有車去葵芳地鐵站，又有巴士去奧海城。食野就要去隔離ke葵盛西先有，有d茶餐廰。行多幾分鐘就有個大D KE商場酒樓咁。環境幾清靜，而住客質素都幾好。

總括來講，以同樣KE價錢，我PREFER月海灣多過太平居LA~新d又有會所而且仲大D tim。

下個星期日約咗睇港灣豪庭。

試粧

2008-06-10T23:01:00.003+08:00

不停嘅OT令到我約咗三次先可以去試到粧……

不過，今次嘅試粧都無令到我哋失望。

因為我試粧果間係我租婚紗嘅婚紗舖，所以，我嘅試粧師對我嚟緊要著嘅婚紗呀﹑晚裝都好熟悉，亦都為我諗好晒粧同髮型，所以整體都非常配合。

而家老細亦都覺得無咩問題。就係咁，我哋又快手快腳咁作出定……Yan就係我結婚果日嘅大會新娘專用化粧師啦。yeah~~~~~

我試粧嘅相已經post咗上facebook啦。朋友們，歡迎參閱。

d衫未finalize架，所以未必係我結婚果日會著嘅。唔怕當日會無新鮮感。 =)

睇樓

2008-06-01T16:36:00.000+08:00

今日同肥妹學完琴，去咗附近揾咗一間地產舖睇樓:

太平花園 17A 565" 2.38M 有間房好黑，無陽光。

太平花園 6B 460" 1.83M

華欣閣 1C 456" 2.38M 有個平台，裝修幾靚，但睡房所有窗都係對住人地個平台。但當日我地睇完已經賣咗。

太平閣 20B 432" 1.98M 好細好殘，開放式睡房。

太平居 7D 453" 2.33M 因為主要8:00pm先到，無睇。佢斜下角對住人地居頂，但我覺得無問題。

太平居 28D 453" 2.69M 比較細，間格一般。

太平居 12B 466" 2.68M 唔係好記得 :p

買金+夏季婚紗展

2008-05-31T16:52:00.001+08:00

雖然唔明夏季同婚紗有咩關係，但係幸福宣言到拎到票，咁未同肥妹一家人(uncle返咗工)飲完茶，就出發。今次目標係婚前檢查。但飲完茶，佢地話想去睇吓d金。間金鋪係屋村式果d，我地選咗比較傳統果d，一來手工平d，二來會有睇頭d ke。但最諗唔係我都有份wor : ) 我有一條金鏈同一個金牌仔~ yeah~~

去到會展，唔知點解比以前幾次婚紗展少咗好多人，今次可以行得舒服d!正!行咗一個圈，都係得兩間做婚前檢查，最後都book咗間平d ke同埋有一次free ke彩光做tim，仲有幸運輪玩tim，但行到埋去，見佢d禮物未係我地落單果時已經送曬埋la wor.... 0_0" 最後我都唔記得拎咗咩la。

跟住行行下，見到有花球package，原來係花園街有三層高果間舖頭，咁近我，又有平，當然book埋la，仲order多一個花球for影相用tim~

最後我地仲買多一個可以釘一個"喜喜"子ke釘孔機，咁就可以為我地d帖加花樣la~

最後去咗同牛牛食飯，同睇吓佢地ke新居。咁又過咗一日la。

婚禮第一張單

2008-05-21T23:40:00.003+08:00

今個星期買咗部printer+fax+scanner。終於可以upload返我地婚禮ke第一張單......就係"擇日"la。呢張草紙真係要好好keep住先得。

p.s. 呢排肥妹好忙，要少心身體ar。同埋就來影相，要記得放鬆d同練笑呀! :D

介子登場

2008-05-18T23:53:00.003+08:00

今日拎咗介子ｌａ，仲刻埋名ｔｉｍ（＾ｖ＾）我地己經完成咗好多野ｌａ～努力！加油！

不過今日ｄ金又升返．．．．ａｉ　ｙａ．．．．

扑咗鎚租婚紗啦

2008-05-12T23:56:00.002+08:00

喺"無試一身輕"嘅日子，最好做咩呢?!

梗係搞我呢世人最重要嘅一件事啦。做個靚新娘，而做個靚新娘當然要有一件靚婚紗啦。今日就去行尖咀，睇吓有咩斬獲。因為今日鵬爺有波打，所以等佢打完先一齊去，仲有Eric同Miss 都一齊去，可能佢哋都需要搜集吓資料同經驗。而我哋又多兩個人幫吓眼，so good。

今日以掃街嘅方式，睇咗都幾多間婚紗舖。一共行咗六間呀。
第一間係間上樓舖。上到去已然好多人，有兩對新人都試緊衫。而我哋就都係揀吓睇吓咁。d婚紗款同晚裝唔係好靚，我鍾意嘅A-line款都唔係好多。不過，佢話可以免費試衫，抱住試吓又無蝕底嘅心態，book晒下個星期日再試。

然後，落到樓下，有一間望落d婚紗都幾靚，行咗入去睇，但d sales完全無理過我，只係由我自己睇，我咁細粒，d婚紗又咁大件，我點拎呀?!鵬爺見我拎唔到，都幫我手，個sales仲懶懶閒企埋一邊。過份，走！

Next…係第二間嘅街舖。佢嘅舖面好寬敞，有兩邊衫揀，一邊係婚紗，一邊係晚裝。d晚裝好靚，比較成熟，但就好有女人味。但因為揀唔到婚紗，所以我哋都係再行吓，打算可以嘅話，就返去租晚裝。

跟住再行，入咗一間好grand嘅婚紗舖，但d sales 又唔得閒理我，我行咗一圈，又走咗。

然後一間就介紹咗一件玫瑰金色嘅婚紗比我。件婚紗係好特別，但我又唔覺得好靚。

之後上咗一間叫做"天作之合"嘅婚紗舖。佢show咗一件婚紗比我，我好鍾意，然後再拎出嚟嘅，都睇唔上眼。就試咗佢，就鍾意咗佢，就book咗佢，仲有其實嘅晚裝。喺度賣個關子，留返大家喺酒席上面欣賞吓。

最後，試吓試吓就決定租呢間啦。就咁，件婚紗就搞掂咗啦。^_^ yeah~~

睇樓預算篇

2008-05-12T09:41:00.002+08:00

絕大部份香港人買樓也會做樓宇按揭，但在分析財務負擔時只會接觸到銀行或地產代理，他們往往為了業務上的利益，會對準買家建議一些很大負擔的按揭計劃，在回歸前樓價長升長有問題倒不大，假如入不敷支便賣樓算了；時移勢易，假如樓宇成為負資產就不能全身而退。那麼，到底怎樣才算是安全的供樓水平呢？我們可以用「十三法則」來衡量：

最多供十年
最少支付三成首期, 最多供款額為家庭入息的三成

供樓超過十年代表支付利息太多，以 200 萬貸款為例：供款期 10 年全期利息 66 萬 (33%)供款期 20 年全期利息 143 萬 (71%)供款期 30 年全期利息 231 萬 (115%)即是說供 10 年比起供 30 年可以省回 165 萬！

首期最少三成不用做第二按揭，利率平一點，也不用買按揭保險等，這筆開支非常昂貴。

供款不多於家庭入息三成是假設家庭有兩份收入，在供款期間禍福難料，假如其中一人有意外沒有收入，如大病一場，另外一人都可以用「六成」收入來供樓,剩餘的「四成」則用來做生活費。

轉載自 http://discuss.com.hk

http://property.nanaland.com/mc/mortgage.html

睇來都係租住數先。^_^"

女人心海低針

2008-05-12T08:44:00.003+08:00

是日母親節，同阿麻飲完茶，跟住就住去奇華買餅卡。因為全世界偉大母親ke關係，我得到個八折。買咗三十七張 $102,三張$62。$62果三張阿媽話係上頭用，三十張$102係過大禮用，回返兩張。阿媽就要九張(自己七張+回兩張)。但呢次買餅疑點重重:

結婚喜事唔係要雙數，點解阿媽會要單數ke呢!?
男家要派嫁仔餅!?定諗住對我好，想換d香港手信比我食呢，但想買比我食又要我比錢呢!?
同埋點解上頭係要三張呢!?我同肥妹一人一個頭，咁仲有個頭係邊個ke呢!?......

問阿媽點解。佢就用咗佢媽咪ke model answer: 要ka，係咁ka，你聽我講。 (x_x")

最後一個問題，點解佢地會覺得比個咁ke答案我，會覺得係解咗比我聽，同埋認為我會收貨ke呢!?真係"女人心海低針"。

租裙褂

2008-05-10T19:00:00.004+08:00

今日同肥妹's媽咪食茶，之後諗住同佢去金都睇衫，行完曬三層d舖頭好多都未開。但唔知係肥妹's媽咪怕羞，唔係好感行人去睇佢d衫，返而睇裙褂多，睇咗幾間，d樣都係差唔多，我都無咩意見。其中一間個sales拎咗件新野出來，肥妹著咗上身，親埋對耳環同個鷄冠頭，都幾ok wor。

阿肥妹's媽咪妹似都幾滿意，而且係到講價，九百講到八百，八百講到可以再平d。但最後都比我話再睇吓先，我地都只係睇咗一兩間je。拎咗卡片就走lu。

跟住係我提意之下，去咗人人都話靚，但租都要幾千蚊一件ke冠南華到睇吓d貴野。你入到去就可以體驗吓 "一分錢，一分貨" ke道理。雖然個design同"金都"都係差唔多。但又真係靚好多，條龍同隻鳳好3D，件衫d紅色都好似新d，靚d。而最令我意外係當妳租咗之後，件裙褂就會hold起，唔會再租比仼何人。果然係"good service, high quality, great price but no discount."今次佢拎咗四件出來比肥妹試，有兩件我地都幾鐘意，一件就清d，一件d花就密d。最後我地......

最後睇埋佢地d茶壺，d design 都幾好，就算第時都可以放係屋企用，價錢又合埋，我地仲會有八折tim。但呢樣可以遲d先買。

買咗介子la~

2008-04-27T20:21:00.001+08:00

今日係六福買咗之前睇中果對介子。係18K White Gold Lovers' Diamond Ring (佢真名好長嫁，叫做 15972014-092-D)。睇咗咁多間舖頭(PN、J's、Mabell、婚紗展)，呢對係第一對我一眼見到就幾鐘意，最有feel，以我性格當然係買咗la。 yeah~
好彩有上次買介子ke經驗，知道佢地減完係可以再減，於是我就用咗三招:

第一招: "睇多幾款"
其實我地一早都lock定個target ka la，呢招係等佢覺得我地係有需要去買介子，唔係無野做入來涼冷氣。

睇咗幾盤介子之後，就出......

第二招"扮走"
呢招係迫佢自動獻身，比個折我。因為通常一出咗個門口，再入返來ke機會就好低，所以佢見你有心買都唔會放通。之後佢比咗個vip再低少少ke價我。

最後一招係"開口"
雖然佢減咗800蚊比我，但都唔可以一口就買。要扮諗一陣(其實個腦係空白)，然後再還多次價。最後再平多百幾蚊成交。

今次最後果步欠少少火侯，應該再貪心d，還個再低d ke 價。要再練厚d塊面皮先得。

揀結婚介指

2008-04-27T02:03:00.003+08:00

鵬爺一直都好想可以戴住對結婚介指影婚紗相。只係一直都揀唔到一對合心水。唔係太普通，怕結婚果日睇起嚟唔夠grand，就係太grand太多石，唔適合日日戴，試問結婚介指又點可以唔日日戴呢?! 搞到行咗好多轉都買唔到。

皇天不負有心人，今晚食完飯之後，無意中行過六福。入面有一對介指都完全符合到我哋嘅要求。佢果個設計係有一隻主介指，得一粒鑽石，比較簡單好適合平時戴嘅。而另外佢仲有一隻鑲晒碎石，好閃嘅雙環外介指，可以將隻主介指套住喺中間。我同鵬爺都幾鍾意。本來諗住扑鎚，點知大家個肚臨時有事，所以諗住轉頭先再買，點知行返轉頭，間六福已經打烊啦。無有怕，六福依然在哪怕無介指呢。下個禮拜我哋捲土重來。哈哈哈……

都係浣熊唔好…

2008-04-17T23:09:00.003+08:00

原先plan咗聽日要影婚紗相，所以今日就好努力咁趕起晒公司手頭上嘅嘢，諗住聽日影相可以無後顧之憂。點知忽然殺出隻浣熊，搞到原定嘅計劃要改期。

我最唔鍾意就係咁樣，準備好晒，講好晒嘅嘢，又要改期。之前ready晒嘅嘢，全部付諸東流。之後仲要由頭再做，三晒(晒精神﹑晒時間﹑晒錢)。由於今日真係太多嘢做，又急於今日之內做完，個人做到真係好煩燥。所以鵬爺打嚟嘅時候，我竟然發脾氣。雖然我脾氣一向都大，同埋發親脾氣都唔需要比面同埋理由。但要鵬爺受到呢個無罔之災，我又真係於心不忍。當我可以再次用我嘅理性去控制我原始嘅獸性之後，我打咗個電話同鵬爺say sorry。做錯事，傷害到人，既然已經唔可以返轉頭，但都好應該向被你傷害嘅人作出道歉，更何況係你鍾意嘅人，有咩唔可以講出口。仲有，鵬爺都係今次影相改期嘅受害者，我又有咩理由將自己煩燥嘅情緒發洩喺佢身上呢。佢係最無辜嘅一個。

希望將來我嘅EQ有所收成，高返一兩呎，咁鵬爺就唔洗咁委屈啦。

浣熊突襲~

2008-04-17T16:44:00.001+08:00

本來聽日影婚紗相，但個天呢兩日都無咩陽光，灰朦朦咁，都諗緊要唔要改期，跟住差唔多四點到，掛咗一號波，最後都係唯有取消，改咗六月先再影，五月廿八再做fitting。

雖然我都知shermen會唔開心，不過其實都可能係一件好事，因為我覺得Shermen同我自己心情上都未ready。而且仲可以多啲時間去練笑、練pose、買介子、再試衫、剪頭髮等等...... 打風都未嘗唔係一件好事呀。 : )

夜晚去咗shermen屋企講數，最後係選咗最平果張帖(但都要$3-$4蚊)，但個樣就真係同價錢成正比。仲有係20張$102 奇華餅卡，遲啲母親節去買。(有節ar~)

同埋我發現咗一樣野，以前ke小霸王改變咗好多，變得比以前靚咗、可愛咗、也更值得我愛咗。 : >

IQ題

2008-04-08T08:56:00.003+08:00

阿A問阿B一樣野好唔好，又想阿B答好，咁應該點做呢?

答案:
阿A:"咁咁咁做好唔好呀?"
阿B:"咁做呀!唔係咁好la."
阿A:"......好!就咁做 la : ) "
阿B:" 0_0' 咁妳又問......"
阿A:"我都無問你."
阿B: x_x'' ......

家長見面日

2008-04-05T21:06:00.000+08:00

精彩lor~......待續

睇場日 + 試衫日

2008-04-04T17:56:00.007+08:00

之前BOOK咗呢個月嘅十八號會影婚紗相，而家都係時候準備一吓嘞。

原先一路都無咩點諗過去邊度影，因為我一路都諗住影赤柱或者石澳。直到小鵬以前個女朋友APRIL比咗佢亞哥嘅婚紗相小鵬睇，小鵬就提議，不如去鐵路博物館影。其實我都無咩所謂，因為我只係鍾意赤柱嘅美利樓，其他嘅嘢對我嚟講都係好一般，不過，我又從來都無去過鐵路博物館，果度係咪真係好D又真係唔知喎。所以趁住放假同CONFIRM 影相行程之前，去視察吓環境啦。諗住大埔海濱公園都好似唔太遠，就一過去晒啦。

去到大埔，我哋搵咗一陣就搵到鐵路博物館嘞，都唔算好難去嘅。不過入到去就發現原來果度都幾細架喎。係條路軌同埋果幾個舊車卡之外都無咩景好影，不過，睇過人哋嘅婚紗相，喺鐵路博物館影出嚟都幾靚嘅。

我哋行完鐵路博物館就去海濱公園。由於唔係太識去，所以問完人再搭車去到富善村，再問人再盲＂中中＂咁就去到嘞。個公園都幾大喎，有好多唔同嘅景點可以影相。我就最鍾意有一個叫西式花園嘅地方，果度有Ｄ好西式嘅櫈﹑拱門﹑水池﹑同埋西式嘅園藝。再者就係佢個近住回歸塔嘅花海，真係有好多花，紅色﹑紫色﹑黃色等等。其次，果度都仲有好多好有層次感嘅地方，不失為影相嘅好地方。行咗兩個幾鐘先行晒個公園，我哋見到有咁多靚嘅花花草草，好快就決定嚟呢度影我哋嘅婚紗相啦。

去完SITE VISITING之後，鵬爺返嚟沖完涼，我哋又出發去揀衫啦。

雖然我哋去到有好多衫都比人HOLD咗，但我都揀咗好幾件過隔離衫，有A-LINE款﹑有拖尾啦﹑有泡泡款，我試咗差唔多成十件婚紗，終於都揀到一件我同鵬爺都鍾意嘅婚紗。之後就揀晚裝，因為我想要D色 HEAVY D 嘅晚裝，所以其實都唔係好多我揀。我試咗五件，我自己比較鍾意一件綠色﹑但鵬爺同個試衫姐姐(阿NIC)都話一件紫色DEPP V好睇D。事實上，我唔係咪鍾意著DEEP V，所以係我力爭之下﹑同時間嘅關係(因為我已經試咗差唔多兩個鐘)，大家都唯有妥協揀咗綠色晚裝。

一路試衫，鵬爺一路幫我影咗D相，又無化粧﹑又無著高踭鞋嘅我，就好似一個細路女"偷"人衫著咁。

我揀完之後就到鵬爺嘞，男仔真好，唔洗半個鐘連揀衫連試衫連度身都搞掂晒。

最後就係同攝影師佢哋CONFIRM當日嘅路線。因為今日做足功課，好快就講掂咗日間嘅路線，只係差晚間嘅路線啫。我哋其實一直都好想返POLYU影少少婚紗相，不過佢就提我哋最好拎咗PREMISSION先，唔好到時一場歡喜一場空。佢又提議我哋如果唔太想影中環，其實都可以去影夜晚嘅青馬大橋，呢個提議都令我幾心動喎。

又行婚紗展

2008-03-16T23:27:00.008+08:00

今日去咗婚紗展，諗住打咗比ar 史d紛，佢可以我地入場，點知個expo分咗兩個hall，我地只可以免費其中一個，最後都係比咗四十蚊入場，仲有四十蚊locker錢tim。

入到去同阿輝一齊買紅酒，有成十幾間賣酒ke，要試曬我都行唔返出會場，但最後試咗兩間，阿輝就決定咗買la。因為我地一齊買得多，拎咗七五折，但買咗四打會唔會多咗d呢?到時飲唔曬，為有拎來沖涼la。

跟住睇咗d小禮物，有筷子、蛋糕毛巾、金莎花，同其他古古怪怪ke野，但樣樣都貴到呢(金莎花都要成$8支)~真係要諗吓一係返大陸買，一係自己製。d請帖重過份，十幾蚊一張d款都係普普通通，睇中果張仲要成廿二蚊。wa~買500 張A4紙都係咁ke價錢。

另外join咗girdle個package，因為就來到四月la，好快就要去影婚莎相。我都要早d訓同敷多d masks先得la。問過過來人亞輝，佢話要對住塊鏡練笑。好開始練習~~

最後睇咗d介子，PN仍然係超多人。有一間真係幾靚，但個價仲靚~ 於是都係買唔到。

唔覺唔覺好快就三八啦

2008-03-04T00:28:00.000+08:00

今年嘅三八婦女節好有意義。
因為，由果日開始計，大日子仲有三百日。 ^_^

緣美傳說，2in1，伊甸園

2008-02-25T23:04:00.002+08:00

今日一次過行曬三間。
緣美傳說-新野，樓上舖，私隱度幾高，裝修幾靚，d staff都幾熱誠，但無地方影相。
2in1-商場裏面，感覺一般，backdrop超假，但近海邊，有得影相。
伊甸園-裝修幾靚，近海邊，有得影相，有個人工xx(肥妹好鐘意)。
就係咁就比咗錢伊甸園，11:30am，仲要早20mins到，呢次無時間玩接新娘la~無計~(^0^)yeah~~

呢個項目又over budget la~但都係值ke~

新年新"朵"

2008-02-11T21:47:00.000+08:00

今年小鵬嘅姑姐們幫我起咗個新"朵" -- 鵬嫂。
叫到我有d唔好意思，不過都幾好聽呀。
"冧"晒。

年初一……講結婚

2008-02-08T00:45:00.000+08:00

今日係年初一，年年都會去小鵬嘅姑姐屋企燒嘢食，今年雖然凍，但都唔例外。

因為，亞峰表弟都係嚟緊會結婚(仲早過我哋兩個月)，所以今日嘅話題都離唔開講結婚嘅嘢。
不過最好笑都係佢哋問返我，小鵬點同我求婚。
佢哋問我，手上隻戒指係咪鵬哥送架，隻戒指咁靚就梗係鵬哥送架啦。^_^
佢哋又問，鵬哥求婚有無跪低呀?梗係要啦，我講明架。唔跪點算求錉喎。 = p
佢哋又問，咁有無花呀?鵬哥咁細心，梗係有啦，鵬哥好識做架。
佢哋又問，咁仲有d咩呀?嘻嘻，鵬哥仲有準備香檳同我哋成個日本之旅囉。 =)

佢哋話鵬哥好浪漫呀，梗係唔係我點會肯嫁佢呀。

第一次試婚紗

2008-01-26T00:29:00.000+08:00

今日去咗試第一次婚紗，試咗兩間。

第一間係"溫馨"，係一間比較舊式d嘅婚紗舖。
好多婚紗，務求大包圍，多嚟多做，薄利多銷。
而d婚紗呢，係好多嘅，但我試果三件我都唔係好鍾意，因為無咩特別。
其他晚裝都係。而且佢仲一d都唔平。

第二間係"華麗邂逅"，係一間model d嘅婚舖。
我試咗四件，第一件係A-link心型心口，著我好瘦，而且尾尾果通花好靚。
第二件就係大拖尾，係果度嘅招牌貨。就咁睇都幾靚，但著落我又覺得同我唔襯。
第三件，唔記得咗添。
第四件係鑲晒水晶，勁閃勁閃架。

我就覺得呢間唔錯，不過都仲可以睇多兩間先決定嘅。
^_^

第二轉睇婚紗

2008-01-20T23:23:00.000+08:00

上次去咗太子度睇婚紗，覺得唔錯。今日去咗尖沙咀睇，以前成日都會覺得尖沙咀嘅婚紗舖d sales 一定唔係咁好相與，一定好易黑面，同埋價錢又會好貴……諸與此類。

但今日去到，見到佢哋有好多款，好多都好鍾意。每個sales都幾落力。

今日用四個幾鐘頭，行咗6間。

第一間個sales姨姨開頭都唔係好願sale我哋。只係比d 相我哋自己睇咗相先。但

第二間就著重婚紗攝影多d，所以我哋都無咩點睇到同聽佢哋介紹就走咗啦。

到第三間，就係最意外嘅收獲。我哋上咗去一間樓上舖，上到去先知原來佢哋係做批發架。佢哋令咗d貨出嚟賣，仲可以做姊妹衫添。果度好多款揀，又好多色，好靚。我諗我哋都會喺果度做姊妹衫。

行過一個街口，再去咗一間樓上舖，果度好多人呀，我哋睇咗兩件婚紗覺得唔錯，佢哋又話可以免費試婚紗，我哋都好想試吓，不過果度真係太多人啦，所以我哋就約吓個星期六上去試。book完時間，我哋就走lu。

誤打誤撞去到第五間，果度有d 二手嘅婚紗賣，價錢唔貴(千幾蚊一件)，仲有兩件我哋都好鍾意添，差d就買咗架啦。最後都係懸崖勒馬，都係再行下先決定。

轉過頭過咗隔離，點知d款同頭先好鍾意嘅都好似，仲有一件鵬爺好堅持嘅婚紗，佢覺得好靚。我哋又book埋下個星期會去試婚紗添。

有婚紗試，好緊張呀!! ^_^

茶煲傳