幸福宣言

今日去咗行太子金都商場，諗住睇吓d婚紗，影相package咁。行咗兩層都無咩特別吸引到我ke舖頭，諗住今次都係空手而回la。
但去到二樓，見到有個肥過我ke肥仔(佬)，見佢幾得意，未睇吓佢d sample，都幾靚wor，影得幾自然(可以加分)。加上係佢好努力係咁sale之下，就入咗去坐低睇吓其他相，點知佢係部Mac機(咁先pro ka ma，再加分)show咗其他客ke相，原來門口果d都係客來ke，就係幾吸引(再再加分)。
而最sell到我係佢講明唔會有額外費用，雖然我都係半信半疑，但又真係中咗我最擔心果樣野(又加多分)。結果係果度到坐咗大半個鐘，佢又講足大半個鐘，到我地走都無問我地會唔會join佢地d package，又無黑面(再加多d分)。
就以上咁多樣野，我對其他舖頭已經睇唔上眼la，而呢間已經係我ke first choice la。遲d睇吓佢地有冇做expo先~~
http://www.declaration.com.hk/

大通重遊……再過登別

第二日，八點幾就起身啦，因為眼見尋日唔到六點個天就黑晒，所以就決定早d起身出去行，唔好浪費時間。

我一起身即刻拎返隻戒指嚟帶，第一証明自己尋晚唔係發夢，第二唔比機會鵬爺收返隻戒指反口。^_^

一早起來，靠近窗邊，看著萬里晴空，風景美得不能言喻，透過落地玻璃都能感覺到外面的寒意。有點興奮因為鵬爺不喜歡悶熱的天氣，但是又有點擔心因為自命強壯的鵬爺只帶著很少和單薄的衣物，真怕他會著涼。站在窗前，看到所有的樹葉都是紅紅黃黃的美到不行。我轉頭跟鵬爺說希望能再到大通公園走走，我想那裡的風景應該也很美吧。

呢朝早，鵬爺應我嘅要求，我哋食完早餐再到大通公園行吓。所以，我們吃完早餐以後，再為了省時，我們把行李整理好，退了房間，和行李寄存好。就坐地鐵到大通公園。不出我所料，那兒真到美到不行，就像一幅風景畫。今朝同尋晚見到嘅嘢實在唔同晒，因為尋晚黑麻麻咩都睇唔到，今日再嚟到，見個成個公園都係一排排佈滿晒紅紅黃黃樹葉嘅樹，真係靚到掟一聲。我哋沿住個公園一路行過去。(大通公園其實係札幌嘅防火線，用嚟隔開札幌嘅商業區同民居，所以佢係一個連住幾個街口嘅長方型公園。

我哋由電視塔出發一直行落去，一路行，一路影相。個公園有好多白鴿，仲有好多勁大隻嘅烏鴉。鵬爺就最驚雀仔，無論大小，只要有個硬嘅咀，可以啄到嘢嘅，佢都好驚。最慘就係d白鴿同烏鴉一d都唔怕人。成日喺我哋身邊飛嚟飛去。成日都嚇鵬爺。


行到咁上下，我哋又去行吓地下街，再搭地鐵返札幌行吓百貨公司同食晏。我今次真係大顯大食妹本色，我竟然食咗兩大碗飯呀。我哋去咗食天婦羅嘅地方，係可以無限次refill白飯架。我眼見隔離枱嘅男仔勁食咗4碗，枱上面食得嘅都比佢食晒，我受到佢嘅感染，我都學人添飯。雖然我無食埋d伴碟，但我就食晒所有嘅主菜同兩碗白飯，令到鵬爺目定口呆呀。

時間差唔多，我們回到酒店，拿取行李。我們就趕往我們下一個目的地--"登別"。我哋去浸溫泉囉。

可惜，去到登別，個天又黑齊晒啦。仲有，d凍添。我哋喺火車站出面等巴士，第一次搭日本嘅地鐵，鵬爺好體貼咁提我上車時記得拎一張車票。要嚟落車比錢。可惜，佢唔記得提我將車票落車時要比返佢，我就咁入咗錢就行咗啦，但個司機又無叫住我喎。只係鵬爺話返比我聽，咁咪當留念囉。= p

我哋沿住唯一嘅行人路行，沿路見到有d人著住件浴袍周圍行，我覺得好得意呀。仲於都去到酒店啦。呢間酒店雖然舊過尋日果間，因為呢度d人識講英文架。咁就好啦，唔洗雞同鴨講。我哋入到房放好嘢。然後就食晚飯啦，正呀，有長腳蟹同毛蟹食呀，仲有魚生。我哋食咗好多嘢呀，然後我哋就去行地獄街，去巡視一吓有d咩可以買嚟做手信。睇埋閻王廟嘅變臉就返去休息啦。

出師不利……又驚又喜

漫長嘅一個星期終於都過，等今日等咗好耐，由於太興奮成個星期都無心工作。好辛苦"hae"過咗。

今朝早機9:20，我哋慢條斯理到8:20~5先check-in，個counter職員話我哋太遲先check-in，可能d行理上唔到機，甚至我哋都上唔到機。不過，話晒距離起飛仲有一粒鐘，都搞得掂嘅。最尾，個職員同我哋講，而家比我哋入閘，但如果我哋去到登機閘前，d乘客上晒機的話就唔會等我哋起飛。所以，我哋一入閘就一支箭咁跑去登機。大煲，架機係30號閘呀，即由登機坪嘅頭跑到去尾。我真係太孱呢，跑咗一陣就"扯蝦"，仲心口痛添。見到鵬爺已經跑離我幾個身位，我只好搏命追，可惜都係唔上，要鵬爺返轉頭拖住我一齊跑。但我真係無氣啦，所以鵬爺自己去登機閘口，諗住可以阻止佢哋起飛，點知去到仲有乘客上緊機。個心先定返d，真係辛苦鵬爺跑嚟跑去。

由於太遲check-in啦，所以原先online check-in時reserve果兩個位比咗人，我哋要分開坐呀，咁都無辦法啦。直到架飛機起咗飛，鵬爺眼見佢前面果排有兩個吉位，我哋就私自調咗位，終於可以坐返埋一齊。^_^

但可能頭先跑咗一段路，同埋坐得好近個機翼，又無嘢睇，又無乜力，所以等食覺得等咗好耐。終於有飛機餐食啦，有冷麵食，仲好好食添呀。食飽咗就覺得好眼瞓，仲有排先落機，我同鵬爺影咗幾幅相就”累”埋一堆瞓咗lu，一直瞓到落機。

落到機，嘩，真係有d凍喎。啦啦聲拎晒d褸出嚟著。

據聞話新千歳機場好多嘢行，我哋行咗一陣，我有一個仲大發現，果陣有d印章比人留念，我哋開始做d有聊嘢，就係去搵d印嚟印。印咗3個(total有10個架)鵬爺頂唔順我咁無聊就話留返走果日再印過。都好，拉住咁大個篋走嚟走去都幾攰。所以就去搭車去札幌。

去札幌嘅途中已經天都黑晒啦，咩景都睇唔到，有d失望。去到酒店check-in，都聽聞日本人嘅英文唔好，估唔到連酒店嘅都係咁。佢哋都唔知想講乜，我同佢哋講英文，佢哋只係可以用英文講到d佢哋成日講嘅嘢，譬如幾點喺邊度食早餐呀﹑幾點check-out呀﹑叫你填form呀﹑同問你拎passport去copy之外，其他嘢都唔係好得啦。

本來搞掂晒，但佢哋忽然間又呆咗，好似有嘢想講，但又唔知點講。我都唔知咩事呀，不過鵬爺好似一早估到咁，問佢哋係咪有d嘢要而家比錢。奇怪嘞，d嘢唔係喺香港已經比晒錢啦咩，嚟到仲比咩錢呀?既然鵬爺自動獻身，即佢知咩事啦，咁我一陣再問返佢都係一樣啫。到咗拎到張鎖匙card準備上房，我咪問鵬爺點解仲要比錢嘅，佢"咿咿um um"都唔知講咗d乜，我都無心機再問，佢覺得無問題就應該無問題，因為佢唔係一個求其是但比錢嘅人，佢肯即佢知箇中原因啦，咁我都唔去煩啦。

上到房，嘩，同Billy大佬講嘅一樣，勁細呀。不過d嘢都幾齊。仲有個數碼電視添，但搞咗好耐都睇唔到。係呢個時候，鵬爺又洗開我，話個洗手間有嘢玩，原來係一個洗"pat pat"機，個廁所仲有暖板，佢叫我去試吓，我見無咩嘢玩咪入去搞吓囉。但人無三急，好難有得去。所以我又"籐"返出嚟。跟住比我發現鵬爺打電話落front desk話佢reserve咗d嘢叫佢哋而家拎上嚟。reserve咗d嘢?!我唔知嘅。我又唔理佢，繼續個齋播雪花嘅電視啦。隔一陣鵬爺又問我玩咗個廁所，好啦橫掂都急急地，我入去玩啦。一坐落去，個廁皮好暖，暖到都唔想起返身，跟住就開始按吓d制啦，佢有兩種mode架喎，一個係噴水，一個係水柱，水力都有得自己教架，仲有d水都係暖架，所以覺得好舒服嘅。好好玩架。

我玩咗一陣又走出去叫鵬爺去玩，點知我又發現佢同front desk講電話，但佢哋完全溝通唔到，今次我聽到啦，鵬爺話佢reserve咗d花同香檳，要佢而家拎上嚟，噢，鵬爺早有準備，一時唔小心比我聽到，唯有乍唔知啦。我去搞多一陣電視都係唔得，所以決定唔搞佢，搞第二樣嘢，左搞搞右搞搞，所有嘢都比我搞完之後，我就去搞搞自己個頭同洗個面準備出街行。呢個時候d 嘢送到嚟啦。d花當然係送比我架啦，我哋同d花影完相，鵬爺就話出去行。

條街勁凍，六點幾七點但條街都無乜人，我哋由酒店跟住地圖行咗幾個街口，行咗去大通公園，沿途一路嘻嘻哈哈一路影吓相，去到大通黑麻麻乜都睇唔到，只係知有好多樹同有個塔，我哋上咗個塔度睇夜景。個塔好高架，上到去睇晒札幌嘅夜景，只可惜初到貴境再加上夜晚，我都完全唔知邊度打邊度。喺個觀望台度行咗一個圈，搞咗一陣紀念吅舖頭嘅紀念品，就走，去到一樓又比我發現有紀念印，我又貪得意走咗去cop印。

然後就去搵嘢食嘞，我哋去返酒店附近嘅一間百貨樓上嘅拉麵共和國度食拉麵。唔…勁大碗﹑勁多料﹑仲勁好食呀。都係700幾yen咋。抵呀。食完九點幾，d嘢都開始閂門啦。我哋喺附近影咗d相，就返酒店啦。

返到酒店鵬爺無啦啦摟住我，問我有幾鍾意佢，佢不嬲都唔問d咁嘅問題，我喺毫無準備之下，同佢講"你覺得我有幾鍾意你咪有幾鍾意囉。"點知佢唔肯罷休，再問我"咁即幾鍾意啫?""好鍾意﹑好鍾意囉。"

講完佢就突然同我講，"咁你嫁比我好無呀?"，佢隻手上面仲拎隻盒戒指。我成個人呆咗，唔知講咩，思想極之混亂，混亂間只係問咗佢一句"點解想同我結婚呀?"我只係聽到佢講話好鍾意我…仲有甚麼甚麼我已經聽唔到，因為我已經好感動，開始想喊。我同佢講"無人企係度求婚架喎。"佢就好快咁單腳跪低問多我一次，"你可唔可以比我?"我真係唔識講嘢啦，我不停點頭，然後已經摟住鵬爺喊咗出嚟啦。

就由果刻開始，我手上就多咗隻戒指啦。 ^_^

我哋跟住開咗支香檳，我飲咗一杯，鵬爺已然飲咗三杯啦。我諗佢真係好緊張，因為佢係一個唔係好識講嘢嘅人，要佢向人求婚應該係一件難事。不過，佢已經做到，仲做得好好添，at least我收貨。

然後我哋又去搞個搞極都搞唔掂嘅電視，我哋決定放棄，叫人上嚟睇，條友搞咗一陣話個電視有事，話幫我哋換房喎。ok啦，佢過一陣打電話同哋講話幫我哋換到第二間房啦，去到第二間房。嘩，間房又大咗，個電視又大咗，仲有私人電腦可以用。原來佢upgrade咗我哋間房呀。正呀~~

仲有九個鐘~~

終於捱過今個星期~仲有九個鐘就飛la~~

一行二人，一個唔認路，一個大頭蝦，兩個唔識講唔識聽。
會唔會......盪失路呢!揾唔到酒店要訓街呢......仲有會唔會好似我諗咁順利呢......

倒數最後四日

緊張，興奮，同好忙。
仲未有時間攪埋旅行啲野tim~

下一步……影婚紗相

酒席訂咗。
結婚當日嘅run down draft咗。
跟住要做d咩呢?
唔~唔~唔~
應該係影婚紗相啦呱。
呢兩日睇咗好多婚紗相。有好多都好靚，都唔知揀咩好。

我比較鍾意d大自然，樹林草原﹑海邊沙灘﹑花圃湖邊﹑小橋流水﹑黃昏日落……要感覺溫馨﹑舒服﹑甜密……

唔知算唔算太多要求呢。

回門……三朝先回定係即日回呀?

好似男主角話齋，星期六拎晒d時辰。全日都係好時辰，只有中間午時咩都唔做得。原先諗住可以有全日唯一嘅兩個鐘頭休息，可以食吓午飯啦。

返到屋企同亞媽傾，原先諗住時間緊迫，都可以即日回門，但人就可能返唔切啦。
點知亞媽又話唔得，佢要我同小鵬連埋隻回門金豬一齊返喎。

咁即係我同小鵬當日可以休息果兩個鐘都要趕返柴灣，無計，亞媽話要咪要囉。
我要我結婚果日，除咗我同小鵬開心，仲有身邊所有嘅人都開心。當然包括埋亞媽啦。

所以暫定下晝十二點半喺白田走，一點三回門啦。

落訂

06/10/2007

今日終於落咗一萬蚊酒席訂，旅行啲野都confirm曬，放心曬。yeah~

跟住應該到影相。

不過最厲害都係兩個小矮人，不停係到"唔......唔......唔"咁唔咗阿Stephen個幾鐘，唔咗唔少野返來，小弟真係甘敗下風。不過都好多謝佢地，令我省唔少。

同埋去拎擇日時晨，點知佢竟然寫錯咗男女家，真係玩野。不過佢都幾識做生意，順手叫女主角睇埋想，收平啲。雖然我唔知佢有幾準，但如果我地都聽佢意見，就算唔發達，都可以健健康康，開開心心。多謝大師指點。

差d嚇"屎"我呀

今日喺公司手提突然勁震，兼顯示一個陌生電話。原本打算唔聽，由於我係有禮貌嘅人，所以…都係聽咗。自己嚇自己，原來係我好姊妹欣姐。但佢把聲奇奇怪怪的，問我同鵬爺睇中果間酒席係咪"君豪會"，我話"係呀，做咩呀?"佢再問我落咗訂未，我再答"未呀，有事?!"佢話佢上網幫朋友搵嘢嘅時候，睇到d forum話君豪會個場好似有問題。佢話send條link比我睇吓。
當時，我當然大為緊張啦，唔知頭唔知路，公司又check唔到email。要返到屋企先知發生咩事。返到嚟第一時間check email，原來君豪會個星級宴會廳因為消防條例不符，所以要重新再裝修過。訂咗嘅酒席全部都要退款。

我即刻大為驚慌，為咗知道係咪我想book個場有事，我由頭到尾睇咗一次所有有關君豪會嘅留言。好彩佢哋講嘅唔係我想book果個，佢講果個喺G/F，我想book果個喺13/F。
所以，我個場……無事啦。

"無事啦，欣姐。唔該晒你。好在有你，唔係我仲烏sir sir呀。thx" ^_^

同阿麻飲茶

31/09/2007
今日阿麻約咗我飲荼，心諗都係問吓我結婚d野。
去到，見到大姑姐同姑丈wor。 "_" '

飲咗幾杯，食咗幾籠野，佢地都無咩動作。我見有dead air，咁我未問吓阿榮買樓。點知佢地就乘乘機機問埋我la。結果都係問咗基本野，同話買樓好過租等等......

飲茶

今日中秋節假期，揾咗anutie飲茶。但間酒樓無冷氣，熱到我熔咗一半。另一半係因為我等緊一個時機。一路食一路揾，一路揾又一路食......
估唔到食咗一大半，機會出現la，佢地開始講始以前結婚d野。 yeah~ 於是等佢地講到興起，就係我問野ke時候。

anutie妳比唔比佢嫁比我ar?
你地鐘意就得la，我無所謂。

yes~"乘乘機機" 大成功。

今日睇場嘅結論

今日鵬爺帶咗我去睇佢嘅first choice，個場無我想像中咁大，但裝修得好靚，設備仲好好，一句講晒，係好正。只係我哋d好日子佢都爆晒。
我哋有緣無份。

跟住再去睇另一個場，係一間私人會所(話就話係私人會所，但佢嘅宴會廳都仲係會外借，有錢梗係要搵啦。)，佢有三個宴會廳，第一個可以擺到45圍，個場得個長字，無咩景，我唔好鍾意。然後去睇第二邊嘅第二個場，呢邊個景就唔同晒啦。勁開揚，仲好fit我哋嘅圍數添，係一個萬無一失嘅場地。

跟住睇埋第三個場，未睇呢個場之前，本來鵬爺都仲係好忠於佢嘅first choice。但見到呢個場之後，佢又覺得呢個場好啱睇。因為呢個場可以玩到好多花樣。而且個場仲好靚，好model添。
然後我哋就去度期，掂呀，我哋嘅大日子，佢有期比我哋呀。

個場正，又得我哋歡心不在話下，仲要有期比我哋，真係天造地設，度身訂做一樣呀。
所以我哋已經預留咗位，我哋係first offer。
因為場地定咗，我哋個心都定返d。
日子亦都決定係二00九年嘅一月三日。

嚟緊就要安排其他嘢啦，好似影婚紗相咁啦。

同一日定分兩日呢?

日子終於都有啦，但酒席的期卻已經被人book得七七八八。就連鵬爺呢期的top 1 場地都無期。

所以要揀最好日的話就要再搵搵其他地方啦。
幸好鵬爺係一個好識變通的人，除了德藝會，佢對九展亦都頗有興趣。
就係咁地方尚在挑選當中。

至於日子呢……我都有諗過在最好日註冊，其他日子擺酒。
但今日同細妹傾過，佢比我的意見係：
橫掂都唔係差好遠，不如一日之內辦妥所有事(註冊+擺酒)，
唔洗費時又費神去安排兩日的事(拍攝拍照﹑租花車旅遊車……)。
而細妹亦都贊成一月三日那個日子，因為可以再儲下錢喎，
最緊要係新一年，亦係人生新一頁開始

而媽咪就話：如果真係鍾意個場，咪睇下一月三日果日夾唔夾到個場囉。
定了一件事，個心會安落d，起碼可以煩少樣喎。

但一切都要同鵬爺再商量，因為佢有一半話事權。
我都要聽佢一半話。

攪珠結果

23/11/2008 sun 十月廿六 *
06/12/2008 sat 十一月初九
03/01/2009 sat 十二月初八
頭兩個都好似full咗，ai ya~

安心晒

一路以為男主角唔緊唔緊，大安旨意嘅性格浮現返出嚟。
原來佢都好緊張架。

知道佢今日自己都去咗睇吓d酒席場地，
聽到佢喺電話度大讚個場，知道佢已經心動不已。
亦終於明白佢都好上心，並唔係懶懶閒。

佢雖然成日都話無咩要求，但佢都真係將所有嘅嘢盡力做好。
最抵錫嘅係再煩嘅嘢佢都唔會嫌辛苦，同唔會要我一個人去煩。

我可以放心比佢話事啦。
安心做個靚靚新娘。
(^_^)

德藝會......真係得得地~~

之前睇過德藝會個web site,都無咩特別感覺。但今晚要去麗晶食飯，咁未順便去睇吓。點知不得了，一見鐘情，感覺比火車站果間仲好好多，樓底又高，min. charge都係十萬就可以包場，一圍都係五千到(搞到個我都不禁同個sales講:"你地個場都幾得ka wor~")，perfect，my first choice~~



p.s.今晚仲係佢地個場新開第一次有人搞wedding。



下次去睇埋九展果個先，佢今個月先開張，有海景，仲有calk walk天橋，雙層舞台(咁係未好似concert咁有個升降台呢!?係就勁la~~)。




Ignore List
Eaton Hotel
佐敦迎囍大酒樓

日本之旅

終於訂咗北海道六日五夜。跟住又要諗一諗每日節目啦。呢個項目係成個婚禮頭炮，本來都plan得幾好，但係為咗等佢安心啲，最後都係穿咗煲，少咗啲驚喜。

仍然揾緊酒席，超煩。

Plan A: 揾過第二間

Plan B: 出年一、二月

Plan C: 今年註冊、出年擺酒

另外有少許擔心錢唔夠，要再諗諗計先得! 不過船到橋頭，係會自然直， no worries~~

(0_0)

總結 :

Lang Ham hotels

December 21, January 4, 18, 24, 25, 31 and all Saturdays and Sundays of February are available

http://hongkong.langhamhotels.com

Park Lane Hong Kong

November 9, 16, 22, 30 December 6, 7, 13, 14, 20, 21, 28 January 3, 4, 10, 17, 18, 24, 25, 31 All weekends in February 2009

MINIMUM FOOD & BEVERAGE CONSUMPTION : 27th Floor - HK$120,000 net (Mon-Fri), HK$170,000 net (Sat-Sun & Festive Dates) ,Maximum for 25 tables

開波啦…… 一頭煙

大家決定結婚就嚟一個月，身邊嘅人比我哋更緊張，更多意見。
提我哋book酒席﹑揀吉日﹑影婚紗相……總之就係我哋兩個嘅手指都數唔晒咁多嘅嘢啦。
雖然明白大家一番好意，但我真係覺得好煩，太多嘢搞，我實在handle唔到。

我上網睇過，要做個靚新娘真係超多嘢做。
揀婚紗﹑減肥﹑hair removal﹑keep住做facil﹑持續節食……為咗一世人一次嘅婚禮，我諗所有女人都可以將性命豁出去，包括我在內。

而呢個咁艱苦嘅過程，我當然要男主角同我一齊經過啦。
雖然佢唔洗瘦身﹑脫毛……但佢都要去搵酒席﹑揀婚紗……老實講，我最驚都係我嘅EQ太低，會發脾氣係男主角身上，咁就大件事啦。

為咗呢件咁值得紀念嘅事，我特意SET-UP咗呢個BLOG，而喺我又氹又"NUR"嘅情況吓，男主角終於都落搭，佢會不時加入佢嘅意見，令到呢個真真正正成為我哋嘅wedding blog。

大家密切留意事態發展囉。