影到啦，影到啦

等咗五個月，改咗四次期，終於都比我同鵬爺偷到一個星期六去影婚紗相啦。

臨影相之前果日都仲落緊大雨，所以星期五當晚都仲係好擔心。好在，皇天不負有心人。星期六果日不知幾好天呀，有晒我哋想要嘅藍天白雲，陽光普照。

我就梗係勁開心啦。其實之前果晚都唔係好瞓得著。今朝就一早出去同鵬爺食早餐。坐低咗，落埋單，先見到鵬爺拖住個喼行入嚟。叫完嘢食完，就行過去影樓。上到去淨係見到化粧師(Iris)。我哋坐咗一陣，就換衫同化粧，鵬爺就趁我化緊粧嘅時候，去花壚拎花球。

佢返到嚟，見到佢成個人濕晒，我仲以為落雨添，原來係天口太熱，所以搞到鵬爺濕咗身呀。等我化完粧之後，就輪到鵬爺啦。Iris幫佢整咗個好型仔嘅頭，可惜爺鵬天生麗質，髮質柔軟。無幾耐，d頭髮就跌返晒落嚟架。

十二點幾度，等鵬爺食完三文治之後，我哋一行六人就坐車到大埔嘅火車博物館。烈日當空，一行出車就已經想標汗。眼見鵬爺要扮型仔，著住件背心﹑腰封同外套，見到都熱呀。影相時候果陣熱法，真係非筆墨可以形容呀。但果日除咗我哋兩個之外，仲有第二對新人喺果度影相喎。

影完火車博物館，就去大埔海濱公園。去到鵬爺就即刻換返件便服，成個人鬆晒。我哋準備再開始影相嘅時候，又見返火車博物館對新人呀，真"轎"。唔知會唔會同一日結婚添呢。

海濱公園我哋都玩咗成兩個幾點，喺太陽落山之前，我哋就出發去下一個目的地--汀九橋。呢次到我換衫啦，我換咗件晚裝，換過個粧，再ready。我換粧嘅時候仲比一大堆蚊調嬉呀。

辛苦完一日，終於都影完啦，了咗個心事，成個人輕鬆晒。yeah~~~~
至於d相呢，就到時拎咗再比大家睇啦。