人奶大作戰 2

馱住亞B嘅時候，由不同渠道吸收餵哺母乳嘅好處，所以晞晞未出世已經同老公商量好，盡可能給囝囝最好的，天賜的禮物。

可惜，一直憧憬餵哺母乳的情景，當自己親自落手落腳餵嘅時候就知道有相當嘅難度。初頭，乳量不足。二來囝囝自出娘胎就超級大食，(其實，喺肚度已經起級大食。)總係餵極唔飽。第三，囝囝初出世，第一次吸吮時，已經整到我好痛，所以一路都有陰影覺得餵人奶好辛苦。

返到屋企，因為方法同時間配合同控制得唔好，因此一度諗過放棄。但始終心有不甘，未曾努力就放棄。所以，決定做泵媽，泵得幾多食幾多。而且，呢兩日晞晞嘅食奶時間都比較穩定，可以喺晞晞食奶前30-40分鐘泵定出嚟比佢。

由今日開始，我又會再次努力，向泵媽呢個目標出發。
努力﹗

十二朝

3月7日係晞晞嘅十二朝呀。我都唔知十二朝有咩意思，只係知今日老公要幫晞晞返亞嫲度拜祖先，同埋D親戚可以上嚟睇晞晞同食薑醋囉。不過，咩意思都好啦，起碼話比我聽我已經做咗人十二日媽媽啦。

今日，亞婆﹑大姨﹑三姨同美琪一家過嚟。晞晞從來都未見過咁多人，比咁多人圍住都係第一次。晞晞好叻無失禮人，無喊。不過，佢竟然喺咁多人面前表現大大。咁果一督真係好大，好大。個個都話勁臭。哈哈……梗係啦，晞晞雖然得十二日人仔，但已經好懶，有幾懶?就係佢會將所有嘅便便儲埋一次清，所以每次都大大督，每次都勁臭臭。

話雖晞晞見到咁多人都無喊，但我同亞媽都見到佢係表面鎮定，內裡驚青。佢其實見到咁多人都驚到咀唇變咗青青紫紫。只係晞晞可能仲未反應得切去喊啫。Anyway, 今日個個嚟到都讚囝囝得意，對眼好精靈。我都好開心呀。仲有，囝囝今日又收到好多禮物。而亞姨送比我同老公嘅禮物仲有好大嘅驚喜，就係盒餅竟然過咗期呀……哈哈……

再戰母嬰健康院

上星期一，晞晞啱啱出世第五日，因為體重未回覆到出世水平，所以就要一個禮拜後再返去磅重。

今日再返去磅重，晞晞一個星期已經重咗0.43kg，有成差唔多9磅呀。醫生仲話佢D體重增加得幾好添。

下次再磅就要等滿咗月之後啦。

首禮拜回顧

返到屋企一個禮拜，真係有D唔識形容。

事實上，返屋企坐月有亞媽幫手，我著實係好輕鬆。但唔知點解自從肥芝出咗世之後，我日日都喊幾次。真係好小事都會眼濕濕，同流眼淚。

喊嘅原因有好多。
1. 餵唔到人奶……肥芝成日都當D人奶係點心，瞓醒拎嚟"mui"兩嘢。然後醒D又搵奶食，我再比佢，佢就推開我。有試過泵出嚟，但D時間又唔見洗。唔係成日都趕得切佢食奶前泵到比佢。仲有，見到肥芝食完奶粉，好滿足咁笑住瞓，有時真係唔明自己點解咁固執要佢食人奶。

2. 覺得亞媽好辛苦。亞媽過嚟幫我手，除咗湊肥芝，仲要買餸﹑煮飯﹑洗衫﹑打掃﹑洗奶樽﹑洗肥芝D衫……佢仲要受氣，有時去買餸買得少又比人話。覺得自己委屈咗自己亞媽。

3. 肥芝受驚喊到嘔奶，我又心痛到喊，好似自己照顧得佢唔好，搞到個仔喊到食晒D風落肚，搞到嘔奶。

4. 坐月咩都唔做得，見到身邊個個忙到一頭煙，自己又幫唔到手。淨係坐喺度抱住個仔，換吓片，遞吓紙巾……其實我都數唔到自己做過D乜，諗落真係無用到爆。

5. 囝囝成日都有痰，搞到食奶食得唔好。見到個仔辛苦，自己仲辛苦。

希望坐月嘅日子快D過，可以親力親為湊囝囝，等亞媽可以多D時間玩吓孫而唔係做工人咁做。囝囝快D清晒D痰，食奶食好D，唔洗肥嘟嘟，但要健健康康。

出院後第八日

同晞晞返咗屋企8日啦。一路都有亞媽陪住，亞媽今日因為一D原因返咗柴灣，我突然有種頓失依靠嘅感覺。雖然今日老公放假，奶奶都有上嚟幫手煮兩餐，但總係唔能夠安心。

其實我並唔係懷疑老公湊囝囝嘅能力，只係擔心囝囝已經識得認人，認得婆婆嘅聲同氣味，到時就喊死囝囝，辛苦死老公，心痛死我。

而且今晚仲少咗一個人去輪更睇住囝囝，真係驚我哋兩公婆唔夠精神湊仔。