啱啱嘔咗啦

我終於都嘔到啦。之前聽到醫生話嘔係証明有荷爾蒙分泌比BB，有嘔好過無。所以就一直好期待自己都會嘔。

頭先食完中藥之後，一路都頂住個胃，好想嘔。折騰咗好耐，老公記得食梳打餅可以舒緩孕嘔，就諗住落街買比我。就係佢閂門之際，我就行入廁所以備不時之需。

就係呢個時候，個制就turn on咗，一發不可收拾。連老公喺走廊都聽到我嘔，即刻衝返入嚟睇吓我點。我都完全控制唔到，不停嘔，嘔到眼淚水都標晒出嚟。

嘔完一輪，終於無事啦。舒服返晒。

老公見到我好D，就啦啦聲去買梳打餅比我，等我今晚嘔完肚餓有得食。