了解仔仔多一點

今日得我同老公喺屋企湊仔。所以，就由我哋同仔仔沖涼嘞。一路仔仔都唔係好鍾意沖涼，一沖親涼就喊到拆天，我哋成日都以為佢驚，仲有卡介苗個傷口痛同D水凍。

老公見今日熱熱地，所以張D水教凍少少，點知仔仔勁開心，仲喺水到玩到側晒身，見到仔仔咁玩得咁開心，我都好開心。 ^_^

仲有呀，我今日放仔仔喺sofa，跟住捉住佢兩隻手，嘗試比佢借少少力起身，練吓D臂力。點知仔仔真係可以成日人坐起身。我同老公都成個人呆咗呀，估唔到仔仔咁勁，人仔細細咁好力。

老公即刻飛過嚟，錄低我同仔仔玩嘅過程，我仲放埋上fb添。仔仔真係好叻仔呀。我準備同仔仔練習吓轉身，不過唔知係咪早咗D呢。我怕自己揠苗助長，到時就弄巧反拙啦。仔仔，你要努力呀，爸爸媽媽永遠都咁錫你咁支持你架。