罪孽深重

囝囝而家每晚都會同我哋一張床瞓，為嘅係可以有人睇到佢瞓覺嘅時候有無嘔奶，同方便餵奶。 尋晚，當我又聽到囝囝喊嘅時候，我就隨手喺床頭拎咗個鬧鐘嚟睇吓係咪夠鐘食奶。睇完想放返上去個床頭櫃嘅時候，一時錯手，成個鬧鐘跌咗落囝囝個頭度。跟住係我大叫嘅同時，就聽到囝囝嚎哭。 我即刻抱起囝囝驚到喊咗出嚟，老公即刻起身開燈，睇吓囝囝整親邊度。但囝囝喊咗兩吓就收咗聲再瞓過，老公同我講囝囝無事嘅，但我已經喊到成個豬頭炳咁。 跟住老公同我講，叫我冷靜吓，佢去沖奶。我就一路喊一路幫囝囝換片。最後，果餐我都留返比老公餵囝囝，因為我好內疚，唔可以再好冷靜咁餵囝囝。果晚，老公要一路餵B一路安慰我。 從此以後，個鬧鐘就放咗落嚟我同老公嘅枕頭中間，慬防我再失手傷到囝囝。